Kong pơlê Dak Nông hiăng hbrâ mâu tơdroăng ki kal vâ troh rôh tơ’noăng mơgêi hriâm râ má pái phôh thong hơnăm 2023. Hneăng tơ’noăng mơgêi hriâm râ má pái phôh thong hơnăm kố dêi kong pơlê Dak Nông ai 7 rơpâu 404 ngế hok tro chêh inâi tơ’noăng, tung mê, ai 1 rơpâu 771 ngế hok tro kuăn ngo.

Lâp tung kong pơlê  tơkŭm po 19 tíu tơ’noăng ƀă 327 veăng tơ’noăng. Mâu tíu tơ’noăng châ tơkŭm po a tơrêm tơring, pơlê kong kơdrâm tơniăn tơ’lêi má môi ăm mâu hok tro tơ’noăng, kơdroh tơdroăng hok tro thế lăm tơ’noăng hơngế, vâ tơniăn hlối tơ’lêi ăm nôu pâ nhŏng o lăm chiân dêi kuăn ‘nĕng lăm tơ’noăng.

Pôa Phan Thanh Hải, Ngế phŏ pơkuâ ngăn Khu ngăn hnê hriâm ƀă hnê mơjiâng tuăn ngôa rơkê kong pơlê Dak Nông ăm ‘nâi, troh nôkố, tơdroăng hbrâ tơ’noăng hiăng hbrâ tŭm tâi tâng mâu tơdroăng kal. Tung pơla a mâu  cheăm, tơring ai tơdroăng ôh tá tơniăn, tơdroăng kring tơniăn dế pêi pro vâ hbrâ mơdât lơ ai tơdroăng ôh tá tơdrăng tung pơla tơ’noăng xúa kơmăi ki dâi lĕm a rôh tơ’noăng hơnăm kố châ kong pơlê Dak Nông tơmâng khât.