Pơreăng COVID-19 hiăng kâi mơdât ƀă dế châ Khu hnê mơhno cheăng dêi tơnêi têa ‘na hbrâ mơdât pơreăng séa ngăn pơkâ chiâng khu pơreăng tiah hmâ, la troh nôkố, a kong pơlê Dak Nông xuân hâi pêi klêi tơdroăng ăm kơ mâu kăn bô̆ ngăn pơkeăng ki veăng pêi tơdroăng cheăng hbrâ mơdât pơreăng. Pêi pro tiô tơdroăng mơhá ăm hnoăng liăn veăng plâ mơdât pơreăng tiô Pơkâ kơxô̆ 16 hơnăm 2021 dêi Chin phuh, klêi hên rôh ăm, troh nôkố kong pơlê Dak Nông xuân ối “chĕn” mâu kăn ƀô̆ ngăn pơkeăng kơxô̆ liăn vâ ăm mê tâi tâng lối 32 rơtal liăn.

A hneăng hôp tơpui tơno ƀă khu chêh hlá tơbeăng nếo a chê kố, jâ Tôn Ngọc Hạnh, Kăn phŏ hnê ngăn Vi ƀan kong pơlê Dak Nông, tối tơdroăng mê, ai hên ki xiâm pro kong pơlê hrá ăm mâu kăn ƀô̆ ngăn pơkeăng liăn ki vâi veăng plâ mơdât pơreăng COVID-19. Môi pâ xua kong pơlê ối xơpá, pá vâ ăm, môi pâ xua thế pêi pro nhên kơtăng thế pro tro tiô pơkâ dêi luât.