Pêi pro mơhá hnoăng liăn hbrâ mơdât pơreăng tiô Pơkâ kơxô̆ 16 hơnăm 2021 dêi Chin phuh, klêi kơ’nâi hên roh mơhá, troh nôkố kong pơlê Dak Nông ối “chĕn” khu kăn ƀô̆ ƀok thái pơkeăng tâi tâng kơxô̆ liăn 32 rơtal liăn. Tối ‘na tơdroăng kố, pôa Huỳnh Thanh Huynh, Kăn pơkuâ ngăn pơkeăng ƀă khăm pơlât kong pơlê Dak Nông tối ăm ‘nâi:

“Kơvâ ngăn pơkeăng ƀă khăm pơlât tơrŭm ƀă kơvâ pơkuâ liăn ngân tơbleăng ăm Vi ƀan kong pơlê vâ ai troăng tah lôi, mê nôkố hiăng châ Vi ƀan kong pơlê tơ’nôm liăn ngân hơnăm 2023, tung mê, tơ’nôm kơxô̆ liăn mơhá ăm nhŏng o tung mâu hơnăm 2020, 2021 ƀă 2022 cho lối 32 rơtal liăn’’.

A hneăng hôp tơpui tơno khu chêh hlá tơbeăng nếo achê kố, jâ Tôn Thị Ngọc Hạnh, Kăn phŏ hnê ngăn Vi ƀan kong pơlê Dak Nông tối, ai hên xiâm kối pro kong pơlê hrá mơhá liăn tơ’nôm ăm mâu kăn ƀô̆, ƀok thái pơkeăng khăm pơlât veăng hbrâ mơdât pơreăng COVID-19. Xuân xua kong pơlê ối pá puât, tăng kơxô̆ liăn, xuân xua pêi pro krá tơniăn tiô pơkâ luât. Nôkố mâu tơdroăng pá puât kố hiăng châ tah lôi:

“Ngin tung mâu hâi pơla kố nah thế hnê mơhno kơtăng ƀă Khu pơkuâ ngăn pơkeăng ƀă khăm pơlât vâ mơhá liăn tơ’nôm ăm kơvâ ngăn pơkeăng ƀă khăm pơlât, laga thế tơniăn pơkâ pêi, ôh tá ăm ai mâu tơdroăng pro xôi, xua mê ai hrá ‘nâng. Nôkố mê tơdroăng kố hiăng hbrâ vâ mơhá, pơla kố nah ngin xuân hiăng tăng mâu kơxô̆ liăn, thế tơkôm liăn ngân 2022 rơlối tung xing xoăng, klêi mê, ngin thê kơdroh hên tơdroăng ki ê vâ tơkŭm xing xoăng liăn ăm kơvâ ngăn pơkeăng ƀă khăm pơlât. Kong pơlê tơmâng tŏng kum ‘nâng, laga xua ôh tá ai ivá xua kong pơlê kơtiê, kơxô̆ liăn ôh tá ai xua mê pá puât’’.

Măng tĭng hdrối nah (hâi lơ 3/6), Roh hôp má 20 dêi Khu hnê mơhno tơnêi têa hbrâ, mơdât pơreăng COVID-19 hiăng hôp mơ’no tơdrêng tung um tiô troăng hyôh măng ƀă mâu tơring. Roh hôp kố hiăng tơpui tơno, mơnhên ƀă  la ngiâ tơbleăng tâi pơreăng COVID-19 a Việt Nam. Nếo achê kố, pôa Phạm Minh Chính, Ngế pro xiâm hnê ngăn Chin phuh hnê mơhno Khu xiâm pơkuâ ngăn pơkeăng ƀă khăm pơlât hbrâ hô sơ pơtroh COVID-19 ing pơreăng tâ tú khu A chiâng khu B (mê cho ing Khu ki rơ-iô chiâng tâ tú rơdâ, kô pro hlâ mơngế) ƀă la ngiâ tơbleăng tâi pơreăng a Việt Nam.

Rơtế ƀă tơbleăng tâi pơreăng COVID-19, pakĭng Hneăng hôp má 5, Kuô̆k hô̆i hneăng má 15, mâu kăn xuân pơkâ thế pro mơnhên tơdroăng, chêl liăn ƀă  mâu kơmăi kơmok, tơmeăm khoăng ƀă tơmeăm châ tŏng kum, ví tơdroăng ‘măn tung hnôu, ai troăng hbrâ ví mơ’nhê tê kơtê ƀă tơmeăm ki kơnâ châ mơhnhôk.

Pôa Trần Văn Lâm, khu kăn teăng mâ kong pơlê Bắc Giang, Kăn cheăng tung Vi ƀan pơkuâ liăn ngân dêi Kuô̆k hô̆i tối a kố ai hên xiâm kối cho mâu kế tơmeăm khoăng tá hâi tŭm chiâng, mơ-éa vâ pơkuâ, xúa tơmeăm khoăng tơnêi têa:

‘’Tung pơla vâi tŏng kum kơmăi kơmok djâ troh tê, ôh tá ai kơbố tơmiât cho pơtroh tơmeăm tơnêi têa ti lâi? Thế ai hlá mơ-éa, yă tơdroăng kih thuât ti lâi. Ki kố tung troăng hơlâ pơkuâ liăn ngân xuân hiăng ăm phêp, chêh ƀă ăm xúa ƀă ‘na ki kơnâ ôh tá ai chêh ôh, bu drêng lâi tơmeăm khoăng kố châ djâ, djâ tê mê nếo thế mơnhên. Drêng tơkôm mê chêh tơmeăm khoăng pakong, klêi mê xúa châ tơƀrê’’.

Mâu kăn teăng mâ Kuô̆k hô̆i xuân tối kal khât vâ Việt Nam hơ’lêh COVID-19 ing pơreăng khu A chiâng B. Mê cho ing khu ki rơ-iô chiâng khu ki tâ tú rơ-iô ƀă cho pơreăng chuyên khoa ki ê, pơlât ƀă mơhá liăn xuân kal pêi pro môi tiah pơreăng chuyên khoa ki ê. Ngăn tiô troăng tâi tâng, pôa Tạ Văn Hạ, kăn teăng mâ khu Quảng Nam tối kal thế pơchân tối ƀă pơtối tơtrŏng ƀă  pơreăng ki nếo:

“ ‘Na Khoa hok khu xiâm pơkuâ ngăn pơkeăng ƀă khăm pơlât lâp plâi tơnêi hiăng ai tơbleăng. Má péa nếo, tiô tơdroăng nôkố Việt Nam tơdroăng rêh ối cheăng kâ, pơlê pơla nôkố hiăng tơniăn tiah hmâ. Kơlo ki rơ-iô dêi pơreăng kố ôh tá râ, rĕng tâ. Ngăn tiô tơdroăng mê vâ pin kal khât tơbleăng tâi pơreăng, laga xuân thế pơchân tối kal pơtối rak tơdroăng pơreăng ki nếo”.

Hluâ 3 hơnăm hbrâ mơdât pơreăng ăm hlo mâu tơdroăng mơ-eăm dêi rêm râ pơlê pơla, tơdjuôm ivá hbrâ mơdât pơreăng laga tâi pơreăng xuân ai hên tơdroăng ki ôh tá vâ gá ai. Kố cho ƀai hriâm thâ hbrâ tá tơmeăm khoăng, mơ-éa luât, tơdroăng hnê mơhno kal khât vâ hbrâ mơdât tơtro tâ mâu pơreăng kân ki ê tâng xông tâ tú.