VOV.Xơ Đăng - Sap ing apoăng hơnăm troh nôkố, Kŏng ti on tơhrik Dak Nông hiăng mơ’no  châ 375 rơtuh kWh on tơhrik ki tê mơdró, tâk 2,5% tâng pơchông ƀă khế kố hơnăm 2021; ki lŭp dêi on tơhrik hiăng kơdroh, kơxô̆ liăn nâp on tơhrik tơkâ luâ tâng vâ pơchông ƀă túa pơkâ. Hiăng ai vâ chê 160 rơpâu ngế kuăn pơlê nâp liăn on tơhrik ing hngêi rak liăn ƀă tơkŭm po tíu nâp (kơxô̆ ngế châ lối 95%).

Kŏng nhân on tơhrik Dak Rlâp séa ngăn troăng kơxái on tơhrik

Ki rơkê tung on tơhrik a Dak Nông rế hía rế tơniăn, pêi pro châ tơdroăng ki rơhêng vâ ‘na mơnhông mơdêk cheăng kâ rêh ối pơlê pơla kong pơlê. Tung 8 khế hdrối nah, lâp kong pơlê hiăng châ ‘nâi ƀă pơxâu phâk 676 ngế pro xôi tung xúa on tơhrik, pêi pro tơdroăng tăng, nâp ƀă pơxâu phâk tâi tâng kơxô̆ liăn 550 rơtuh liăn. Mâu tíu pêi cheăng on tơhrik ôh tá pơtê hơ’lêh nếo, mơdêk xúa hơ’lêh kơxô̆ tung hnoăng cheăng rak ngăn vâ rak vế tơniăn tơdroăng ki ‘no ƀă xúa on tơhrik châ tơbleăng tơƀrê má môi.

Katarina Nga tơplôu ƀă tơbleăng