Tiô tơdroăng vêh rah xo khu pêi cheăng, khu gak ngăn kong dêi kong pơlê Dak Nông kô kơdroh 4 inâi pro kăn pơkuâ gak ngăn kong. Tơdroăng kố châ Khu pơkuâ ‘na pêi chiâk deăng ƀă mơnhông thôn pơlê kong pơlê tơbleăng kơxê lơ 28/6. Tiô pơkâ dêi Khu pơkuâ ‘na pêi chiâk deăng ƀă mơnhông mơdêk thôn pơlê kong pơlê Dak Nông ‘na vêh tơkŭm po khu gak ngăn kong ối tung Kơ koan xiâm pơkuâ gâk ngăn kong, khu pơkuâ gâk ngăn kong tơring Dak Glong ƀă Khu gâk ngăn kong pơlê kong kơdrâm Gia Nghĩa châ pro môi chiâng Khu pơkuâ gâk ngăn kong tơring Dak Glong – Gia Nghĩa. 

Khu pơkuâ gak ngăn kong tơring Tuy Đức – Dak Rlấp. Khu pơkuâ gak ngăn kong tơring Dak Song ƀă khu pơkuâ gak ngăn kong tơring Dak Mil pro chiâng môi Khu pơkuâ gâk ngăn kong tơring Dak Song – Dak Mil. Khu pơkuâ gak ngăn kong tơring Krông Nô ƀă Khu pơkuâ gâk ngăn kong tơring Čư Jut châ pro chiâng môi Khu pơkuâ gak ngăn kong tơring Krông Nô – Čư Jut.

Tiô tơbleăng dêi Kơ koan xiâm gâk ngăn kong Dak Nông, 8 tíu pơkuâ gak ngăn kong dêi 8 tơring, pơlê kong kơdrâm hdrối nah ai 23 ngế kăn ƀô̆ cho kăn pơkuâ. Klêi kơ’nâi vêh rah kô kơdroh 4 inâi pro kăn, 18 ngế kăn ƀô̆ châ vêh rah xo, 1 ngế kăn ƀô̆ hiăng pơtê cheăng xua hơnăm hiăng krâ.