VOV4.Xơ Đăng - Kŏng ti ngăn on tơhrik Dak Nông tơbleăng hên tơdroăng tơkêa bro ‘na hnhâng kơxái on tơhrik troh tung thôn pơlê, mơ-eăm vâ tâi tâng mâu cheăm châ pêi tiô pơkâ kơxô̆ 4 ‘na  pro on tơhrik tung thôn pơlê ƀă tâi tâng rơpŏng kuăn pơlê ai on tơhrik xúa tơniăn. Tung hơnăm 2022, on tơhrik Dak Nông rak ngăn ‘no liăn cheăng mơjiâng 53 tơmeăm khoăng ‘no mơjiâng, 22 tơmeăm khoăng ‘mâi rơnêu ki hên ƀă tâi tâng kơxô̆ liăn lối 150 rơtal liăn.

Tơdrêng ƀă tơdroăng ‘no liăn hnhâng troăng kơxái on tơhrik, kŏng ti xuân pơtối mơdêk tơdroăng tơdah xo on tơhrik hạ áp a thôn pơlê ing mâu khu tơrŭm cheăng kong pơlê. Tíu pêi cheăng hiăng tơdah 6 khu pêi cheăng tơrŭm xúa on tơhrik ƀă lối 120km troăng kơxái, 9 tíu krâ ‘măn kơmăi on tơhrik, pêi pro ‘mâi mơnhông tơ-brê on tơhrik ki mơ’no ăm lối 17 rơpâu rơpŏng kuăn pơlê.

Dak Nông mơ-eăm châ 100% kơxô̆ rơpŏng châ xúa on tơhrik

Mơhé tơnêi tíu pá tung prôk lăm, troh nôkố tâi tâng mâu thôn pơlê a Dak Nông xuân hiăng ai on tơhrik xúa ƀă xúa tung pêi cheăng, kơxô̆ rơpŏng xúa on tơhrik châ lối 99%. Tơdrêng ƀă tơdroăng ‘no liăn mơjiâng pro, ‘mâi rơnêu kơmăi, troăng kơxái, khu ngăn on tơhrik Dak Nông tơmâng mơdêk ki tơ-brê tung tê mơdró, tơ’lêi hlâu pro hlá mơ-éa, mơdêk xúa kŏng ngê̆ thŏng tin vâ pro pơxúa ăm kuăn pơlê rế tro tâ.

Gương tơplôu ƀă tơbleăng