Kơxo hâi lơ 26/5, Vi ƀan kong pơlê Dak Nông tơkŭm po hneăng Hôp khĕn kơdeăn tơdroăng ‘mâi hơ’lêh tơdroăng cheăng, ‘mâi hơ’lêh tơdroăng ‘no liăn tê mơdró kâ. Ƀă tơdroăng mơ-eăm ‘mâi hơ’lêh tơdroăng ‘no liăn cheăng tê mơdró, kong pơlê Dak Nông hiăng pêi pro tơƀrê mâu tơdroăng tơxâng hâk mơnê mơhno ing mâu kơxô̆ tối ing khu mơdró pơtối tâk tung 4 hơnăm hdrối, ki tơxâng vâ tối cho hên kơlo kơxô̆ PCI hơnăm 2022 ai mâu tơdroăng pơ’lêh hên, môi tiah kơlo kơxô̆ ki pơxá ối má 17/63.

Nôkố, kong pơlê Dak Nông dế pơtối tơbleăng mâu troăng rơhlâ, mê cho: mơdêk châ ‘nâi mâu tơdroăng, tí tăng ‘nâi ƀă tah ki xơpá, tơvâ tơvân ăm khu mơdró, mơ-eăm kơdroh kơxô̆ liăn ôh tá khât, mơdêk ki tơƀrê tung pêi pro mâu luât pơkâ tŏng kum mơ-eăm kum khu mơdró.