VOV4.Xơ Đăng - Drêng pêi pro mâu tơdroăng tơkêa bro on tơhrik kơtâu ƀă khía, mâu khu tê mơdró a Dak Nông tơkêa kô veăng kum hên kơxô̆ liăn ăm kong pơlê. Laga, kong pơlê hiăng ôh tá tơngăm xếo drêng châ xo liăn nôkố bu iâ tâng pơchông ƀă tơdroăng tối hdrối apoăng. Tiô chêh tối dêi Kơ koan xo hnoăng mơhá kong pơlê Dak Nông, 8 khế hiăng hluâ kơxô̆ liăn xo hnoăng mơhá ing mâu tơdroăng tơkêa bro on tơhrik kơtâu ƀă khía tung kong pơlê châ 18 rơtal liăn, bu ƀă 6% tâng pơchông ƀă kơxô̆ lối 300 rơtal liăn/hơnăm ki kong pơlê tối kô châ xo drêng kĭ 6 tơdroăng tơkêa bro ƀă tâi tâng ivá 430MW tung hneăng hơnăm 2019 - 2021.

Xo liăn ngân ing on tơhrik kơtâu ƀă khía 8 khế hiăng hluâ a Dak Nông bu châ 18 rơtal liăn

Mơnhên xiâm kối kố, Khu rak liăn ngân kong pơlê Dak Nông tối ăm ‘nâi, tung kơxô̆ 6 tơdroăng tơkêa bro on tơhrik kơtâu ƀă khía pêi pro tung kong pơlê, bu ai môi tơdroăng tơkêa bro ai ivá 50MW teăm kêi đeăng ƀă hiăng tê mơdró hdrối hâi lơ 31/10/2021. Mâu tơdroăng tơkêa bro ki ê hiăng ôh tá teăm mơjiâng, tơdjêp. Mâu tơdroăng tơkêa bro on tơhrik kơtâu ƀă khía hrá mơ’no on tơhrik tơdjâk hên pêi lo liăn tiô tối hdrối dêi kong pơlê.

A Sa Ly tơplôu ƀă tơbleăng