Kơxê hâi lơ 14/6, Vi ƀan kong pơlê Dak Nông tơkŭm po hneăng hôp tơbleăng pro klêi căn cước công dân ăm tâi tâng kuăn pơlê ki hiăng tro hơnăm tung lâp kong pơlê ƀă tối tơdroăng pêi pro tiô Tơkêa 06 dêi Chin phuh. Tiô Đăi tă Bùi Quang Thanh, Ngế xiâm pơkuâ kŏng an kong pơlê Dak Nông, séa ngăn pêi pro tro tiô hnê mơhno dêi Ngế xiâm pơkuâ kŏng an, khu kăn Đảng kong pơlê, Hô̆i đong hnê ngăn kuăn pơlê, Vi ƀan hnê ngăn kuăn pơlê, Kŏng an kong pơlê Dak Nông hiăng tơbleăng pêi pro hên troăng rơhlâ ki tơƀrê, rơkê ƀeăn, hriăn plĕng ki nếo.

Ing mê,  pơtối pêi rơdêi hnoăng cheăng dêi tai tâng mâu kŏng an, mơhnhôk veăng pêi dêi tơdroăng cheăng kal kí tung lâp kong pơlê. Ƀă tơdroăng tơbleăng pêi kơtăng, tơdrêng tơdâng, rơkê ƀeăn mâu troăng rơhlâ pêi, ƀă tơdroăng pơkâ “Pêi tâi tơdroăng cheăng, ôh tá tâi chôu”, pêi cheăng plâ hâi  măng, ôh tá ai hâi pơtê, mơhé hâi leh “Prôk tơrêm hơlâ troăng, tơgôu tơrêm hngêi” vâ séa ngăn, pro krúa tơdroăng chêh ‘măn tung kơmăi krếo kuăn pơlê lăm pro căn cước.

Riân ta troh hâi lơ 29/5/2023 mâu Kŏng an kong pơlê Dak Nông hiăng pro klêi ƀă ăm Căn cước công dân ăm tâi tâng kuăn pơlê ki hiăng tro hơnăm tung lâp kong pơlê, luât hâi khế tơhrâ ƀă Khu xiâm kŏng an ƀă pêi klêi hdrối tơdroăng pơkâ dêi khu xiâm kŏng an lối 2 khế.