Kơxo lơ 19/5, a pơlê kong kơdrâm Gia Nghĩa (Dak Nông), Vi ƀan hnê ngăn kong pơlê po Leh tơbleăng “Têt pêt loăng plâ rơxông pâ Pôa Hồ” ƀă pêt kong tơkŭm, pêt loăng tơprâ tơprŭng hơnăm 2023. Rơtế ƀă pơlê kong kơdrâm Gia Nghĩa, a tai tâng 7 to tơring dêi kong pơlê Dak Nông, mâu khu râ, pơkuâ cheăng rơtế ƀă hên hĭn kuăn pơlê mâu hdroâng kuăn ngo xuân veăng tung Têt pêt loăng hơnăm kố.

Tiô tối hdrối, tung rôh kố, lâp kong pơlê Dak Nông kô pêt 163 rơpâu xiâm loăng tŭm túa. Krê a pơlê kong kơdrâm Gia Nghĩa, kơxo lơ 19/5, mâu kăn rơtế ƀă hên hĭn kuăn pơlê ƀă đoân viên, droh rơtăm hiăng pêt 1.000 to xiâm loăng hngó tâ tá kơpong um meăm N’trang Lơng.

A Leh tơbleăng, pôa Lê Trọng Yên – Kăn phŏ hnê ngăn Vi ƀan kong pơlê Dak Nông krếo thế mâu khu râ, pơkuâ cheăng rơtế ƀă kuăn pơlê mâu hdroâng kuăn ngo tung kong pơlê mơdêk hiâm mơno rak vế kong prâi tơnêi tíu, kơhnâ veăng pêt ƀă rak vế loăng ngiât, rak vế kong.