Hô̆i đong hnê ngăn kong pơlê Dak Nông, hneăng má 4 nếo tơkŭm po hôp rôh má 6. Tối tơbleăng a rôh hôp ăm hlo, 6 khế kôố nah, ki tâk ‘na cheăng kâ dêi Dak Nông châ 5,23%, iâ tâ tâng vâ pơchông ƀă tơdroăng pơkâ ai 7,5%. Xo liăn ngân bú châ dâng 1.550 rơtal liăn, kơdroh troh 20,5% tâng vâ pơchông ƀă hơnăm nah.

Tơdroăng xo liăn ngân ‘no mơjiâng tơmeăm khoăng tơnêi têa trâm hên xơpá tơvâ tơvân ‘na luât pơkâ, luât tŏng kum. Tung mê, pơkâ  hdró, pơkâ xúa tơnêi hrá, pơkâ hdró bauxite tơdjâk hên troh tơdroăng mơnhông mơdêk cheăng kâ, rêh ối a kong pơlê. Tơbleăng a rôh hôp, pôa Lưu Văn Trung, Kăn hnê ngăn Hô̆i đong kong pơlê Dak Nông thế mâu kăn Hô̆i đong hnê ngăn kong pơlê tơpui tơno, mơnhên mâu tơdroăng ki xiâm, malối cho xiâm ki tơngôu tá vâ rĕng tơmâng ‘na tơdroăng ki u ối, ki pá tơvâ tơvân tung xo liăn ngân ‘no mơjiâng tơmeăm khoăng tơnêi têa. Ing mê, tơbleăng troăng vâ pêi tơkâ luâ xơpá, mơnhông cheăng kâ rêh ối pơlê pơla.