VOV4.Xơ Đăng - Tiah lâi pơtối 3 hơnăm achê kố, Dak Nông đi đo ối má mơ’nui tung inâi chêh điêm tơ’noăng râ má pái trung hok phôh thong tơnêi têa. Kố cho tơdroăng ki kal châ tối a Hneăng hôp má 4, Hô̆i đong hnê ngăn kong pơlê Dak Nông má 4 po tung 2 hâi hdrối nah. Hneăng tơ’noăng râ má pái phôh thong hơnăm 2022, Dak Nông ai kơxô̆ ngế plah tơ’noăng châ 96,7%; điêm trung bình môn châ 5,9 điêm, ối má 61/63 to kong pơlê, pơlê kong kân tung lâp tơnêi têa.

Hô̆i đong hnê ngăn kong pơlê Dak Nông tiâ mơnhên ‘na ki rơkê plĕng tung hnê hriâm

Kố cho hơnăm ki má 3 pơtối hlối Dak Nông ối top má mơ’nui tung inâi chêh klêi kơ’nâi tơ’noăng râ má pái phôh thong. Tối a rôh hôp Hô̆i đong hnê ngăn kong pơlê Dak Nông, pôa Nguyễn Văn Toàn, Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Nông tối ‘na xiâm kối cho xua kơxô̆ hok tro ki chía rơkê a kong pơlê iâ, mê điêm trung bình mâu môn tơ’noăng gá iâ.

Tơ’nôm nếo hên hok tro hiăng hriâm ƀă vâ rah mot hriâm đăi hok, tơdroăng ki tơ’noăng bu vâ xo điêm plah tơ’noăng xo. Ƀă tơdroăng ki ối trâm hên xơpá môi tiah Dak Nông, pôa Nguyễn Văn Toàn tối tiah kố, mơni kô rĕng hơ’lêh inâi ối tơ’noăng ra má pái dêi kong pơlê.

Katarina Nga tơplôu ƀă tơbleăng