Tối mơgêi a rôh pêi cheăng, Kăn xiâm pơkuâ hnê ngăn Đảng khĕn kơdeăn Đảng ủi Kuô̆k hô̆i hiăng hbrâ, hnê kơtăng tung mâu kăn, hnê mơhno, tối nhên troăng hơlâ dêi Đảng; tơdroăng mơjiâng luât ai hên ki pơ’lêh nếo, malối tơdroăng tơkŭm po klêi hneăng tâ phĭu rah xo kăn kăn Kuô̆k hô̆i hneăng 16 ƀă Hô̆i đong kuăn pơlê rêm râ hneăng 2026-2031.

Tung la ngiâ, Kăn xiâm pơkuâ hnê ngăn Đảng pơkâ thế pơtối hnê pêi nhên Pơkâ hneăng hôp má 14, rơtế ƀă tơrêm tơdroăng, pơkâ nhên; mơdêk hơ’lêh luât tiô troăng dêi Đảng, mơdêk ki tơƀrê mơjiâng luât, séa ngăn, ai tiô púi vâ dêi kuăn pơlê.

Kăn xiâm pơkuâ hnê ngăn Đảng tối nhên: tuăn loi, tơngah ƀă kuăn pơlê tung lâp tơnêi têa tơngah ôh tá xê to pơtê a mâu hlá phĭu mê thế pơ’lêh chiâng mâu pơkâ tro ‘ló, mâu luât ki tơƀrê, mâu tơdroăng cheăng séa ngăn ki khât ƀă tơƀrê. Mâu troăng hơlâ, luât pơkâ ki kân dêi Đảng thế châ pơtroh chiâng mâu tơdroăng mơjiâng luât, mâu pơkâ ki nhên.