Troh a kơtâu Mỹ Khương, cheăm Mỹ Tịnh An, tơring  Chợ Gạo, kong pơlê Tiền Giang, ngế ki lâi xuân ‘nâi pôa Lê Văn Thủy, 58 hơnăm, cho môi ngế đảng viên ki pêi chiâk rơkê râ lâp tơnêi têa. Pôa nôkố cho ngế xiâm ai kơdrum kân rơdâ 1,8 ha tơnêi pêt loăng plâi rơga ki hmâ. Pôa Thủy ăm ‘nâi, rơpŏng pôa hdrối nah pêt báu la ki pơxúa tung cheăng kâ ôh tá  tơƀrê hên mê pôa chiâng pơ’lêh pêt loăng plâi rơga klêa bông vâ chê 30 hơnăm hdrối.

Sap hơnăm 2012, châ hnê tối, kơvâ cheăng hiăng hnê mơhno pêi pêt tiô pơkâ VietGAP klêi mê troh Global GAP tiô troăng tơrŭm ƀă khu pêi cheăng tơrŭm Mỹ Tịnh ƀă hlối tê ăm kong têa ê.

Kơnôm kơhnâ pêi cheăng kâ hlối ‘nâi xúa kih thuât tung pêt rak ngăn mê kơdrum loăng plâi rơga dêi rơpŏng pôa Thủy rêm hơnăm ai plâi hên ƀă plâi  hlối lĕm, ngeăm há. Tâng riân rêm hơnăm, kơdrum plâi rơga mê ai plâi 3 hdrôh, châ xo sap 50 - 60 tâ̆n. Tâi tâng plâi rơga dêi pôa xuân châ khu pêi cheăng tơrŭm Mỹ Tinh rôe tâi ƀă yă kơnâ tâ yă pơkâ tê a kơchơ ai péa pái rơpâu liăn môi kg.

Rơnó tô mơdrăng hơnăm kố, kơdrum loăng plâi rơga dêi pôa Lê Văn Thủy hlối châ xo dêi 20 tâ̆n plai, tê ƀă yă 22 rơpâu liăn/kg, châ xo 450 rơtuh liăn. Pôa Lê Văn Thủy tối:

“Vâ pêi pêt tiô pơkâ Global GAP ki kal cho pin hôm vâ pơ’lêh túa pêi pêt dêi tơná há lơ ôh, thế tơmiât troh ki krúa lĕm kế kâ, tơniăn ăm mơngế ki rôe xúa. Nôkố ngin pin thế pêt tiô pơkâ krúa, tung tơdroăng xôh pơkeăng, rơvât phon thế xúa trếo hưh cơ, mâu kông, hnông, alâi, hrái báu pro phon ăm tơnêi tơná hơpok lĕm, vâ ai tơmeăm pêi lo tơniăn krúa, hlối tơtro ƀă mơngế vâ rôe”.

Tơdroăng ki tơxâng hâk mơnê ƀă ngế đảng viên Lê Văn Thủy cho ‘nâi mơ-eăm hriăn plĕng tung pêi cheăng kâ. Tung pơla mê hên kuăn pơlê a kong pơlê tơxup dêi rơpó pêt plâi rơga klêa khêi mê pôa ‘’pêt to‘’ plâi rơgá klêa bông. Xua tiô pôa, túa plâi rơga bông iâ tro pơreăng kâ ‘nhiê, plâi kơtóu hên ƀă kong têa  Mih châu Âu rơhêng vâ rôe.

Tung pơla hdrối nah, mơhé plâi rơga ai rôh ôh tá ai vâi vâ rôe, yă rơpâ ó la pôa ôh tá lao tuăn xuân pơtối ‘no liăn rak ngăn, mơdêk tơƀrê dêi kơdrum loăng plâi. Pôa Nguyễn Văn Nam, Kăn hnê ngăn Vi ƀan cheăm Mỹ Tịnh An ăm ‘nâi, pôa Lê Văn Thủy cho môi ngế đảng viên kơhnâ tung pêi chiâk deăng  a kong pơlê:

“Pôa Tthủy pêt tiô túa pơkâ VietGAP ƀă khu pêi cheăng tơrŭm pêt tiô pơkâ mê plâi kơ’muăn hên, hlối lĕm há. Nôkố túa pêt dêi rơpŏng pôa tơƀrê hên. Má péa, pôa tôh ƀă bek, hơ’lâk pơkeăng hlối toi kơxái ôh ôh tá êa kơƀin xôh mê tơ’lêi hlâu, hlối kơdroh hâi pêi cheăng la xuân châ tơƀrê hên. Nôkố tâng plâi rơga klêa bông yă lối 15 rơpâu liăn/kg cho dế tơniăn’’.

Ing túa pêt plâi rơga klêa bông vâ tê, rơpŏng pôa Lê Văn Thủy hiăng châ kro mơdrŏng ƀă hên kơxô̆ liăn pêi lo rêm hơnăm châ dâng 1,5 rơtal liăn. Hơnăm 2020, pôa phiu ro châ Ngế pro xiâm hnê ngăn Chin phuh diâp ăm ƀâng kơdeăn khĕn ai hnoăng kơhnâ ‘nâi mơ-eăm tung pêi cheăng. Pakĭng mê ngế ki pêi chiâk kố xuân châ Tíu xiâm Khu ngăn kuăn pơlê pêi chiâk Việt Nam, Vi ƀan kong pơlê Tiền Giang ăm hên ƀâng kơdeăn khĕn ai hnoăng kơhnâ tung tơdroăng cheăng dêi Khu ƀă ‘na tơ’noăng pêi chiâk deăng,

Ôh tá xê to pêi cheăng kơhnâ rơkê mê pôa Lê Văn Thủy ối pro Ngế pơkuâ chi hô̆i trương, Chi hô̆i Kuăn pơlê pêi chiâk a kơtâu Mỹ Khương, cheăm Mỹ Tịnh An. Tung mâu hơnăm hdrối nah, pôa kơhnâ khât ƀă tơdroăng mơhnhôk cheăng, ‘na tŏng kum pơlê pơla mê cho kum kuăn pơlê ki kơtiê xơpá, mơjiâng pro troăng prôk. Tơná pôa hiăng lối 30 hdroh veăng pleăng mơheăm tŏng kum mơngế.

Pôa Lê Văn Thủy tối:   

“Cho kuăn pơlê Việt Nam la hiăng vâ chê 60 hơnăm tơdroăng cheăng Đảng mê cho tơdroăng hâk tơngăm ‘nâng. Krê tơná a mơhé hrá la a hiăng ‘nâi nhên tơdroăng pêi pro ki kal kí dêi tơná, vâ ƀă luât pơkâ, pâ kơ Đảng, Tơnêi  têa tung  mâu hơnăm u ối tung pơla tơná ối rôh á kô mơ-eăm pêi tâi tâng mâu tơdroăng ki lâi tơná chiâng pêi  pro, má môi thế rêh ối ăm tơná rêh ối tơdrăng lĕm, rêh ối lĕm tung rơpŏng hngêi, rêh ối lĕm ƀă nhŏng o tung pơlê, pơla, hriâm tiô tơdjâ hiâm mơno ki lĕm tro dêi Hồ Chí Minh, pro tơdroăng ki lĕm ăm kuăn ‘nĕng rak vế, pro ƀối’’.

Hiăng vâ chê 60 hơnăm la tuăn mơno ối hâk vâ kơhnâ ƀă tơdroăng pêi chiâk ƀă túa pêt loăng plâi rơga klêa bông tê ăm kong ê ƀă mơngế đảng viên “ki pêi chiâk’’ la pôa Lê Văn Thủy xuân ối kơhnâ pêi cheăng. Pôa ăm ‘nâi, ối ai ivá mê xuân ối pơtối mơ-eăm veăng pêi cheăng ƀă rơpŏng hngêi, mơ-eăm pro kro mơdrŏng ing pêt loăng plâi rơga vâ pro ngế djâ troăng ahdrối mơhno ăm kuăn cháu pêi ƀối.