Pôa Y Bhiu Ƀyă, 68 hơnăm, cho kăn phŏ hnê ngăn Chi ƀô̆, kăn ƀuôn Tơng Jú, cheăm Ea Kao, pơlê kong kơdrâm Ƀuôn Ma Thuột xuân cho môi ngế pôa krâ pêi chiâk ki kuăn pơlê loi nhoăm. Ai tơnêi 1,2 ha dêi rơpŏng hngêi, pôa pêt 900 xiâm kơphế, pro mâu kơdroăng chu, í, rêm hơnăm tê châ xo lối 1 tâ̆n kơphế kloăng, rơtế châ xo sap 70 -80 rơtuh liăn ing tê chu, í.

Hlo túa pêi cheăng kâ păn mơnăn, pêt loăng plâi dêi rơpŏng hngêi pôa châ tơƀrê, hên mâu rơpŏng kuăn pơlê tung pơlê kố hiăng hriâm ƀối. Tơdroăng hnê mơhnhôk kuăn pơlê pơ’lêh tơdroăng tơmiât tung pêi cheăng kâ ing mê hlo tơƀrê.

Pôa Y Bhiu Ƀyă tối:

“Hnoăng cheăng á cho hnê tối, mơhnhôk kuăn pơlê tung pơlê pêi pro tro troăng rơhlâ dêi Đảng, luât Tơnêi têa. Ing mê, kuăn pơlê kô hlê plĕng. Kuăn pơlê tung pơlê thế môi tơrŭm môi tuăn, kuăn ‘nĕng, cháu chái tung hdrông hdrê ôh tá ai tơdroăng rĕng xo on veăng, mơ-eăm pêi cheăng kâ châ xo tơ’mot kơxô̆ liăn, veăng ‘no hnoăng mơjiâng thôn pơlê cheăng kâ tiô túa nếo mơnhôn dêi cheăm rế tơƀrê’’.

Đảng viên Y Tuyên Ƀkrông,  kăn pơlê dêi ƀuôn Dray Hling, cheăm Hòa Xuân,  pơlê kong kơdrâm Ƀuôn Ma Thuột. “Tơpui ƀă hlối pêi ‘’, pôa hlối cho ngế ki djâ troăng a hdrối tung mơnhông cheăng kâ rơpŏng hngêi, hlối hnê vâi krâ nhŏng o tung pơlê tơ’noăng dêi rơpó pêi cheăng kâ, veăng mơjiâng dêi thôn pơlê châ tơƀrê. Tiô pôa Y Tuyên, tơdroăng hnê tối, mơhnhôk pêi pro mâu troăng rơhlâ dêi Đảng,  mơngế kăn ƀô̆ đảng viên thế ‘nâi kơdôu mơ-eăm:

“Á troh lăm mơhnhôk vâi rôh apoăng vâi ôh tá vâ hmâng, xua kơchơ tê mơdró dế mê nah yă kơnâ. A ôh tá lao tuăn, môi hdrôh ôh tá vâ hmâng, mê lăm mơhnhôk rôh má 2, má 3... Troh tối nhên ăm vâi hlê tâng troăng châ po rơdâ mê yă tơnêi kô to kơnâ, prôk lăm tơ’lêi há, pin hiu chiu lŭp iâ apoăng ƀă kô châ pơxúa kân kơ’nâi ah. Klêi mê kuăn pơlê nếo hmâng pêi pro ƀối’’

Pơlê kong kơdrâm Ƀuôn Ma Thuột, kong pơlê Dak Lak nô kố ai 376.000 ngế kuăn pơlê, tung mê ai 15.140 ngế đảng viên. Đảng viên cho kuăn ngo lối 1.000 ngế, tung kơxô̆ ki mê ki hên cho đảng viên kuăn ngo Rơđế. ki hên đảng viên mơngế Rơđế nôkố dế hmâ tơkŭm hôp a 33 chi ƀô̆ pơlê, tung mê ai 15 ngế kăn hnê ngăn chi ƀô̆, 19 ngế cho phŏ hnê ngăn, ƀă 31 ngế veăng cheăng tung râ ủy.

Tiô pôa Trần Vũ Cường - Ngế pơkuâ khu tơrŭm cheăng Đảng pơlê kong kơdrâm Ƀuôn Ma Thuột, mâu hơnăm hdrối, hnoăng ki pêi pro dêi đảng viên  kuăn ngo hmâ tơkŭm hôp a mâu pơlê  pơtối pêi hnoăng cheăng a hdrối tung tŭm tơdroăng. Mâu đảng viên cho mâu ngế ki hnê tơpui rơkê, hnê kuăn pơlê rak tro troăng rơhlâ dêi Đảng, luât Tơnêi têa.

Tung mê, cho mơhnhôk tơ’noăng pêi chiâk, tơrŭm ƀă mâu kơvâ cheăng, khu grup a kong pơlê mơjiâng luât pơlê, pơkâ tơmâng mơnhông tơdroăng rêh ối tiô túa lĕm tro a mâu pơlê, kring vế tơniăn, mơjiâng thôn pơlê nếo, rak lĕm hyôh kong prâi.

Pôa Trần Vũ Cường  ăm ‘nâi, tung la ngiâ, Khu ngăn Đảng pơlê kong kơdrâm Ƀuôn Ma Thuột, kong pơlê Dak Lak ăm ‘nâi, vâ pơtối pêi tơƀrê tâ nếo hnoăng djâ troăng lĕm a hdrối dêi đảng viên kuăn ngo,  khu kăn Đảng pơlê kong kơdrâm kô pơtối tơbleăng hnê pơkâ ăm hriâm tơ’nôm rêm râ ủy, mâu kăn hnê ngăn, kăn phŏ hnê ngăn chi bô̆ ’na tơdroăng cheăng Đảng.

“Khu kăn Đảng pơlê kong kơdrâm tơmâng khât troh tơdroăng hnê ‘na kal kí, tuăn mơno lĕm ăm mâu kăn ƀô̆ râ ủy, mâu kăn hnê ngăn, kăn phŏ hnê ngăn ƀă đảng viên a mâu chi ƀô̆ malối cho mâu chi ƀô̆ a kơpong hdroâng kuăn ngo. Tiô rêm khế, ngin xuân ai pơkâ hnê tơ’nôm, mơnhông tơdroăng mơhnhôk kuăn pơlê rơtế ƀă chi ƀô̆ cheăm bêng pêi tro troăng rơhlâ dêi Đảng, luât Tơnêi têa”.

Kăn xiâm hnê ngăn tơnêi têa hneăng hdrối Hồ Chí Minh hiăng tối “Chi ƀô̆ cho xiâm dêi Đảng, chi ƀô̆ lĕm tro mê tơdroăng cheăng pêi kô tro há’’. Mâu đảng viên a mâu pơlê Rơđế pơlê kong kơdrâm Ƀuôn Ma Thuột, kong pơlê Dak Lak dế pêi pro hlo tơƀrê tơdroăng Pôa Hồ hnê.