Hâi lơ 13/6, khu kăn ki pêi dêi hnoăng cheăng dêi Tíu xiâm Đoân Droh rơtăm Kŏng san Hồ Chí Minh hiăng lăm pôu, diâp ƀă vêh diâp Mê dái “Hơnăm ối nếo khên tơnôu” ăm 5 ngế kăn ƀô̆, kŏng an ki tro ƀă ki hiăng hlâ tung rôh ai xâu xía a tơring Čư̆ Kuin, kong pơlê Dak Lak a hâi lơ 11/6 kố nah.

Tiah mê, khu kăn ki pêi dêi hnoăng cheăng dêi Tíu xiâm Đoân Droh rơtăm hiăng troh a hngêi pơkeăng kân kơpong Tây Nguyên vâ pôu êng ‘na ivá ƀă diâp Mê dái “Hơnăm ối nếo khên tơnôu” ăm 2 ngế kăn ƀô̆, lêng dế pơlât tro rong mê cho: Thươ̆ng tă Đàm Đình Bốp prế Đăi ŭi Lê Kiên Cường, pêi cheăng a Kŏng an cheăm Ea Ktur, tơring Čư̆ Kuin.

Rơtế amê, khu kăn kố xuân troh pôu, tơpui tơno, mơhnhôk rơpŏng ƀă vêh diâp Mê dái “Hơnăm ối nếo khên tơnôu” ăm 3 ngế krê ki ê, mê cho: Đăi ŭi Nguyễn Đăng Nhân, pêi cheăng a Kŏng an cheăm Ea Ktur; Thiê̆u tă Trần Quốc Thắng prế Đăi ŭi Hà Tuấn Anh, pêi cheăng a Kŏng an cheăm Ea Tiêu. Kố cho mâu kăn ƀô̆, kŏng an ki tro rong ƀă hlâ tung pơla pêi dêi hnoăng cheăng rak vế gâk kring, rak tơniăn a tơring Čư̆ Kuin, kong pơlê Dak Lak a hâi lơ 11/6 kố nah.