Kơmăng lơ 4/11, a Plông kân Lâm Viên, pơlê kong kơdrâm Đà Lạt, Tíu xiâm Đoân Droh rơtăm Kŏng san Hồ Chí Minh tơrŭm ƀă khu kăn pơkuâ hnê ngăn Đảng kong pơlê, Vi ƀan kong pơlê Lâm Đồng tơkŭm po Leh mơhá Pri Lương Định Của rôh má 17 ƀă mơhá Pri tơ’noăng mơgêi tơdroăng tơkêa bro pơxiâm pêi cheăng dêi mâu droh rơtăm thôn pơlê hơnăm 2022.

Luâ 17 hơnăm tơkŭm pêi pro, Pri mơhá Lương Định Của hiăng ô eăng 2.025  “Ngế pêi chiâk kơhnâ rơkê”. Ƀă hơnăm kố, Pri châ mơhá ăm 32 ngế droh rơtăm ki kơhnâ rơkê ai tuăn kơdo mơ-eăm vâ pro kro mơdrŏng ƀă châ ai hên hnoăng pêi pro tung lâp tơnêi têa. Tung  mâu ngế droh rơtăm ki châ xo pri Lương Định Của hơnăm 2022 ai hên mâu hơnăm ối nếo pêi cheăng châ xo lối 30 rơtal liăn ƀă ai ngế ki ‘nâ pêi cheăng châ xo 706 rơtal liăn, ki rơkâ châ rơtal liăn rêm hơnăm. Malối, hên mâu hơnăm ối nếo cho hdroâng kuăn ngo tung kong pơlê, tơring, cheăm kơtiê xơpá la ƀă tuăn tơmiât ‘nâi kơdo mơ-eăm mơnhông tơná vâ pro kro mơdrŏng ki tơxâng ing ivá tơná, chiâng  ngế ki kro mơdrŏng dế hơnăm ối nếo.

Mê cho mâu ngế ki kơhnâ tung mâu tơdroăng mơhnhôk khu droh rơtăm tơ’noăng pêi chiâk deăng tê mơdró rơkê, hơnăm ối nếo tơrŭm ivá mơjiâng thôn pơlê nếo a kong pơlê.