Tung roh kố, Khu Vâi kơdrâi tê mơdró kong pơlê Dak Lak diâp 27 pu pái kăn ăm 7 rơpŏng vâi kơdrâi hdroâng kuăn ngo a mâu tơring Krông Bông, Krông Ƀuk, Čư Kuiñ ƀă pơlê kong kơdrâm Ƀuôn Ma Thuột. Rêm rơpŏng châ tŏng kum sap ing 3 - 5 pu pái kăn tiô xoăng ăm dêi pó pu pái kăn hdrê tung pơla 2 hơnăm. Tung tơdroăng păn, mâu vâi kơdrâi tê mơdró ƀă khu pơkuâ vâi kơdrâi pơlê kong kơdrâm kô rơtế, séa ngăn mâu rơpŏng, tơdrêng tŏng gum ‘na kih thuât, tơmeăm chĕm ƀă troăng rak ngăn pu pái.

Kơxô̆ pu pái châ diâp ối tung tơdroăng Tơdjêp păn pu pái - Tăng cheăng pêi, cho tơdroăng mơhnhôk “120 tơdroăng cheăng rơtế vâi kơdrâi, vâi hdrêng kơtiê’’ klăng roh tơ’noăng ki má môi koh phiu ro leh tơbâ 120 hơnăm mơjiâng kong pơlê Dak Lak.