Klêi kơ’nâi tơmâng mâu rơkong tơpui, pôa Phạm Minh Chính, Ngế pro xiâm hnê ngăn tơnêi têa kheăn kơdeăn rơkong tơpui tá hiâm mơno, pôu râng hnoăng cheăng, tơtro ƀă tơdroăng nôkố, trâu hơngế, dâi lĕm dêi mâu Ngế pro xiâm phŏ hnê ngăn tơnêi têa ƀă mâu kăn teăng mâ veăng Hneăng hôp. Ki rơhêng vâ tối, cho phiu ro hiâm mơno vâ ‘nâi hên, khên tơmiêt khên pêi, khên tơpui dêi mâu khu tê mơdró mơjiâng tơmeăm veăng Hneăng hôp, hiăng pơkâ pêi mâu tơdroăng ki châ tơƀrê, tuăn tơmiêt pơhlêh nếo tơmiât pêi rơkê rơtế veăng tơleăng mâu ƀai toăn kân dêi tơnêi têa.
Ngế pro xiâm hnê ngăn tơnêi têa pơcháu Ƀơrô Chin phuh pơkuâ, tơrŭm ƀă Khu xiâm mơjiâng pro tơmeăm ƀă mâu khu xiâm, kơvâ cheăng ki tơdjâk tơmâng tŭm mâu rơkong tơpui, ăm tơbleăng tơdroăng tối mơgêi Hneăng hôp vâ môi tuăn hnê mơhno, po rơdâ pêi pro. Tung la ngiâ Ngế pro xiâm hnê ngăn tơnêi têa pơkâ thế, khu râ kăn pơkuâ mâu Khu xiâm, kơvâ cheăng, kong pơlê, mâu khu tê mơdró mơjiâng tơmeăm đi đo mơnhên nhên tơdroăng pêi pro mâu tơdroăng tơkêa bro ki xiâm, mâu tơdroăng tơkêa bro ki kal Tơnêi têa châ tơƀrê, tro tiô tơdroăng pơkâ pêi cho xiâm kối ki xiâm vâ pêi pro tơdroăng pêi cheăng kơmăi kơmok, tiô rơxông nếo.
Viết bình luận