Hneăng tơ’noăng mê, ai lối 79 khu tơ’noăng ƀă 158 ngế tơ’noăng ki ối tung tơnêi têa, 1 khu tơ’noăng lâp plâi tơnêi, veăng ƀă hên mâu khu rơxế ƀă hên túa rơxế. Ƀă tâi tâng pri kơnâ lối 500 rơtuh liăn, hneăng tơ’noăng klâ chiâng hên râ tơ’noăng, mê cho: khên tơnôu pêi tơdroăng ki rơ-iô, mơdêk ƀă rơkê. Hneăng tơ’noăng tơkŭm po a pơlê kong kơdrâm Gia Nghĩa ƀă kơpong kong ilâng, ngo ngối, thông trâu ki ai xêh a Nâm Nung, cheăm Nâm N’Jang, tơring Dak Song.

Khu tơkŭm po hiăng pro 25 troăng tơ’noăng ƀă mâu tíu vâ mâu kuăn pơlê châ hlo, châ ngăn. Pôa Hồ Anh Tuấn, Kăn phŏ hnê ngăn Kâu lăk ƀô̆ rơxế kơtâu troăng ki ‘mêi, ngo ngối, tơnêi hmố, troăng thông Sài Gòn, Kăn pơkuâ tơkŭm po tối ăm ‘nâi, hneăng tơ’noăng vâ mơjiâng hneăng tơ’noăng ivá dêi ô tô ki rơkê kơtâu drô troăng ki ‘mêi, ngo ngối, troăng hmố, troăng thông, tơdroăng tơ’noăng tro lĕm tung tơnêi têa.

Hneăng tơ’noăng ôh tá xê to djâ troh mâu tơdroăng ki châ hlo ƀă sôk ro ăm mâu ngế ki hâk vâ kơto rơxế têi, kố ối cho roh vâ tơbleăng hên kế tơmeăm ki ai hlâu, hnối vâ mơnhông kơvâ ôm hyô dêi kơpong tơnêi tơníu, kong kế Dak Nông.