Tung péa hâi lơ 16 – 17/5, a kong pơlê Xiengkhuang, peăng kơnhŏng kong têa Lếo tơkŭm po Leh pơcháu, tơdah, khôp pâ ăm mơhúa ƀă djâ vêh 96 kơxêng kiâ mô đô̆i cho lêng pleăng hnoăng cheăng ƀă mơngế rơkê Việt Nam hlâ a pái kong pơlê Vientaine, Xaysombun ƀă Xingkhuang vêh ƀă tơnêi nôu Việt Nam.

Rơnó tô khăng khoăng hơnăm 2022 – 2023, Khu ti tăng kơxêng kiâ, ối tung Khu xiâm pơkuâ mô đô̆i kong pơlê Nghệ An hiăng tơkŭm po ti tăng, tơkŭm, xo tâ ‘măn lĕm 96 kơxêng kiâ mô đô̆i hlâ a 3 kong pơlê, châ 120% pơkâ mơ’no. Leh khôp pâ mơhúa châ tơkŭm po khôp pâ ăm mơhúa mâu mô đô̆i pleăng hnoăng cheăng ƀă mơngế rơkê Việt Nam po kân krip tiô khôi dêi tơnêi têa Lếo nhŏng o.

Tiô pơkâ pêi, leh ‘mé kơxêng kiâ 96 kơxêng kiâ mô đô̆i châ chiâ xo ƀă djâ vêh a pơlê xiâm roh kố kô tơkŭm po a hâi lơ 19/5 a Ilâng kiâ mô đô̆i tơring Nghi Lộc, kong pơlê Nghệ An.