Kơmăng hâi lơ 4/8, a tíu pêi cheăng Chin phuh, pôa Phạm Minh Chính Ngế pro xiâm hnê ngăn Chin phuh pơkuâ hôp roh má  Môi dêi Khu hnê mơhno Tơnêi têa tơbleăng Pơkâ kơxô̆ 68 dêi Khu xiâm kal kí ‘na mơnhông cheăng kâ krê dêi kuăn pơlê. Kơ’nâi 3 khế Pơkâ kơxô̆ 68, tơdjâk nhên ma môi cho pơ’lêh  lĕm, pơ’lêh tuăn tơmiêt ki hlê plĕng dêi tâi tâng pơlê pơla, ing xiâm tơnêi têa troh kong pơlê, tơkŭ, po, tơrŭm khu, kuăn pơlê, mâu khu mơdró, rơpŏng ki mơdró kâ. Tơdroăng pơxiâm pêi cheăng  tâk iâ. Khế 6/2025 tối hdró tơdroăng ton nah drêng kơxô̆ khu mơdró mơjiâng nếo châ lối 24 rơpâu khu mơdró. Khế 7 lâp tơnêi têa ai lối 61 rơpâu rơpŏng mơdró kâ nêó mơjiâng, tâk luâ péa hdroh tâng vâ pơchông ƀă hơnăm nah.

A rôh hôp, pôa Phạm Minh Chính  Ngế pro xiâm hnê ngăn tơnêi têa tối nhên, pêi pro mâu pơkâ hiăng tối a mâu pơkâ dêi khu xiâm Kal kí, Kuô̆k hô̆i, Chin phuh ƀă pơkâ, kal thế dêi khu mơdró, mê cho xua khu mơdró krê dêi kuăn pơlê chiâng tơdroăng ki mơhnhôk kân khât mơnhông cheăng kâ tơnêi têa. Ngế pro xiâm hnê ngăn tơnêi têa pơtối mơdêk tơleăng mâu tơdroăng vâ khu mơdró pơtối  xua tơmeăm khoăng, hnê mơngế pêi cheăng, khoa hok kŏng ngê̆, pơ’lêh kơxô̆... pơtối pro kơdroh ‘na pro hla mơ-éa hên tơvâ tơvân, mơdêk xoăng râ, xoăng hnoăng ăm mâu kong pơlê.

Ngế pro xiâm hnê ngăn tơnêi têa pơkâ thế mâu kong pơlê tơ’nôm, pê klêi pơkâ tơdroăng tơkêa bro nếo, pakĭng mê tơkŭm mơjiâng khu luât pơkâ tŏng gum  khu mơdró krâ kơvâ ƀă kŭn ‘na tơmeăm khoăng mê cho on tơhrik, mung pêi tơnêi, liăn ‘nâp  tơdroăng ki kô ki mê. Mơdêk tơpui tơno, tơmâng hnê tối mơjiâng luât, luât pêi cheăng, tơdroăng tŏng kum  dêi kuăn pơlê, khu mơdró, rơpŏng ki mơdró kâ.