Kố cho troăng ki hbrâ ki kal, tơniăn hâi xah hêi ro kuăn pơlê pơkuâ dêi hnoăng cheăng châ tơkŭm po tro luât, tơniăn, mơnhên hnoăng pơkuâ ƀă tơdroăng ki ai mâ dêi Tơnêi têa a kơpong têa kơxĭ rơlố krih tơviah dêi Tơnêi têa. Tiô tơbleăng dêi khu râ kăn pơkuâ kơpong cheăng kâ Trường Sa, lâp a tíu kố ai 21 kơpong tâ phĭu.

Troh nôkố, tơdroăng hbrâ châ pêi pro tơdâng tơ’mô, tro tơdroăng pơkâ, tro luât. Tơmeăm khoăng châ hbrâ tŭm, ai 22 kơthung tâ phĭu ki xiâm, 16 kơthung phĭu ki tơ’nôm rơtế tâi tâng mơ-éa ki kal, inâi mơngế ki tâ phĭu, mơ-éa phĭu ki rah xo. Tơdroăng hôp tơno kal kí, chêh inâi mơngế ki tâ phĭu ƀă ngế ki tơbriât to pro kăn châ pêi pro krá tơniăn, tơbleăng tơdrăng.

Tơdroăng pơtâng tối châ mơdêk rĕng, gum kăn ƀô̆, mâu lêng ƀă Kuăn pơlê hlê plĕng trâu hơngế ki kơnâ kal kí má môi ki kal dêi roh tâ phĭu. Klêi kơ’nâi roh hôp, khu râ kăn pơkuâ kơpong Trường Sa hiăng pơcháu kơthung tâ phĭu, theh ngế ki lăm tâ phĭu, mơ-éa ki kal rah xo mâu ngế pêi hnoăng cheăng. Péa toăng tuk dêi kơpong 4 Khu lêng gâk kring têa kơxĭ hiăng lo ing kơno tuk Cam Ranh, kong pơlê Khánh Hòa, djâ mâu khu pêi cheăng rơtế ƀă kơthung tâ phĭu tơkâ têa kơxĭ troh mâu rơlố a kơpong Trường Sa.