Kơxo hâi lơ 22/6, a kong pơlê Oudomxay, Peăng kơnhŏng kong têa Lếo, po leh pơcháu, djâ vêh 10 khu kơxêng kiâ mâu lêng mố đô̆i ki pleăng hnoăng tơná, mâu ngế rơkê Việt Nam hiăng hlâ tung rôh tơplâ a 6 to kong pơlê peăng Kơnhŏng kong têa Lếo vêh a tơnêi têa. Kố cho mâu ngế hlâ ai hnoăng châ Khu ki tăng rôu chiâ xo dêi quân khu 2 tăng hlo tung rôh má 2 rơnó mơdrăng hơnăm 2022-2023.

Veh leh ai kăn teăng mâ peăng kơnhŏng kong têa Lếo, kăn teăng mâ chin phuh Lếo, Kăn teăng mâ Kuân khu 2 rơtế ƀă hên kuăn pơlê dêi kong pơlê Oudomxay. A rôh leh, Thiếu tươ̆ng Đinh Mạnh Phác,  Kăn phŏ pơkuâ ngăn lêng Kuân khu 2 hiăng tối mơnê khât kơ Khu pêi hnoăng cheăng Chin phuh Lếo, mâu kăn ƀă kuăn pơlê 6 to kong pơlê peăng kơnhŏng kong têa Lếo hiăng pro tơ’lêi hlâu vâ Khu tơkŭm lăm tăng dêi Kuân khu 2 pêi hnoăng cheăng.

Thiếu tươ̆ng Đinh Mạnh Phác púi vâ Khu pêi hnoăng cheăng mâu kong pơlê peăng kơnhŏng kong têa Lếo kô pơtối tơrŭm mơdêk hnoăng cheăng lăm tăng, tơkum chiâ xo, djâ vêh kơxêng kiâ mâu ngế ki rơkê, mâu lêng Việt Nam ki hlâ ai hnoăng tung rôh tơplâ a kong têa Lếo.