Hâi lơ 1/11, ing tơdroăng xua kuăn pơlê pơtroh tơbleăng, Đô̆i K51, Khu xiâm pơkuâ Mô đô̆i kong pơlê Dak Lak tơrŭm ƀă khu cheăng ƀă khu râ kăn pơkuâ kong têa Kul ti tăng, chiâ rôu xo châ 2 kơxêng kiâ mô đô̆i a kơpong achê têa plông Ô Tôi ƀă têa plông Đắk Đam, kong pơlê Mondulkiri.

Tung mê, a kơpong têa plông Ô Tôi, khu ki ti tăng châ hlo 1 kơxêng kiâ mô đô̆i rơtế hên kế tơmeăm dêi mô đô̆i Việt Nam. A kơpong pá xôp têa plông Đắk Đam, tôh pêi cheăng pơtối chiâ rôu xo châ 1 kơxêng kiâ mô đô̆i rơtế mâu tơmeăm môi tiah kơchiê̆n ếo, hmân ếo, kơ’lo pơkeăng penicillin, loăng chêh ƀă chêng khŏng chếi. Péa kơxêng kiâ mô đô̆i hiăng châ djâ a tíu pơkuâ, rak ngăn ƀă xối pleăng. Klêi kơ’nâi 2 khế pêi pro hnoăng cheăng rơnó tô 2026 – 2027 a kong têa Kul, Đô̆i K51 hiăng ti tăng hlo, chiâ rôu xo châ 10 kơxêng kiâ mô đô̆i. Mơhé ối hên pá puât ‘na tơnêi tơníu, kong prâi ƀă tơdroăng ki châ ‘nâi, kăn ƀô̆, mâu mô đô̆i đông lêng xuân mơ-eăm ti tăng, veăng gum djâ kơxêng kiâ mô đô̆i, mâu ngế ki rơkê ƀă khu mô đô̆i ki pleăng hnoăng cheăng Việt Nam hlâ a kong têa Kul vêh ƀă tơnêi nôu.