Đoân viên droh rơtăm veăng mơdâng hlá cơ, rơnuâ ƀă mơgrúa lĕm a mâu tíu tâ phĭu a hngêi hôp tơdjuôm pơlê pơla, hngêi hôp kân thôn, pơlê ƀă tôh kuăn pơlê kơphô̆.

Tung dế mâu tíu tâ phĭu, khu droh rơtăm veăng rah mơnhên, tâk tăm pŏng ƀă ‘măn chôu lế lĕm kơtâ phĭu ki pôk. A hên troăng kân, mâu “troăng hlá cơ Tơnêi têa” mơjiâng tơdroăng ki lế lĕm tơmiât troh hâi tâ phĭu.

Tơdroăng pơtâng tối ‘na tâ phĭu châ pêi pro rơdâ lâp mâu pơlê kong pơlê Dak Lak. Ing tíu xiâm kơdrâm kuăn pơlê rêh ối tê mơdró troh mâu troăng kân thôn pơlê, mơngiơk ếo ngiât droh rơtăm đi đo ai mâ tung mâu tơdroăng pơtâng tối troh lâp lu.

A mâu kơpong thôn pơlê, kuăn pơlê hmâ lăm chiâk deăng hrá vêh, khu cheăng droh rơtăm tơkŭm po pơtâng tối troh lâp lu a kơmăng vâ kuăn pơlê tơ’lêi ‘nâi tơdroăng.