Tối tơbleăng a leh pơxiâm po Festiaval reăng Đà Lạt rôh má 9, jâ Võ Thị Ánh Xuân, Kăn xiâm phŏ hnê ngăn tơnêi têa  tối tiah kố, kơ’nâi vâ chê 130 hơăm mơjiâng ƀă mơnhông mơdêk, Đà Lạt - pơlê kong kơdrâm rơpâu to reăng ôh tá xê to mơhno ki rơdêi cho xiâm kal kí,  tíu pêi cheăng dêi tơnêi têa, cheăng kâ, mơhno túa lĕm tro dêi kong pơlê Lâm Đồng, mê ối veăng ‘no hnoăng mơnhông kơpong Tây Nguyên rĕng ƀă krá tơniăn.

Festival reăng Đà Lạt roh má 9 cho leh ki ro, ai tơdjâk pơxúa khât, hlối ô eăng ki lĕm krê dêi Đà Lạt, hlối mơnhông kơvâ cheăng ‘na pêi pêt, tê mơdró  ƀă tê reăng ăm kong têa ê, tơmeăm pêi lo hiăng châ mơnhên inâi “Đà Lạt - cho tíu ki lĕm ing tơnêi lĕm’’.

Jâ Võ Thị Ánh Xuân, Kăn xiâm phŏ hnê ngăn tơnêi têa tối:

“Tơdroăng pơkâ kơxô̆ 23 dêi khu xiâm kal kí hiăng mơnhên pơlê kong kơdrâm Đà Lạt cho kơpong peăng Hdroh Tây Nguyên’’.  Tơdroăng ki mê ăm hlo Đảng ƀă Tơnêi têa loi khât, khĕn kơdeăn ki mơ-eăm khât ƀă mâu tơdroăng pêi ki kal ki Đảng ƀô̆, mâu kăn, kuăn pơlê rêm hdroâng kuăn ngo tung kong pơlê Lâm Đồng, pơlê kong kơdrâm Đà Lạt hiăng châ pêi pro tung mâu hơnăm hdrối, xuân moi tiah tơmeăm khoăng, ki tơ’lêi hlâu malối dêi kong pơlê.

A loi khât tiah kố, tung la ngiâ Đà Lạt - Lâm Đồng pơtối rak vế ki rơdêi dế tơdroăng tơrŭm môi tuăn hdroâng kuăn ngo, tí tăng ‘nâi plĕng pơxúa tơƀrê mâu tơmeăm khoăng ki rơdêi , ai hlâu, veăng ‘no hnoăng tơxâng a tơdroăng mơnhông tơdjuôm dêi kơpong Tây Nguyên ƀă tung lâp tơnêi têa’’.

Ƀă tơdroăng pơxá ‘’Đà Lạt - pơlê kong kơdrâm pŭn rơnó reăng‘’ Festival reăng Đà Lạt rôh má 9 hơnăm 2022 cho tơdroăng tơdjêp, mơhno, nhoăm ô eăng mơngế pêt reăng ƀă tơbleăng mâu tơmeăm khoăng ki kơnía git ‘na reăng, ‘na mâu tơmeăm pêi lo ing chiâk deăng ki vâi ô eăng ƀă ki lĕm dêi Đà Lạt.

Tung mê, kơvâ pêt reăng tíu kố hiăng pro pơxúa châ xo tơ’mot liăn hên, veăng mơdêk ki kal tung tơdroăng mơnhông cheăng kâ -rêh ối tơdjuôm dêi kong pơlê Lâm Đồng.

Po kơchơ pêt kơchâi reăng Đà Lạt hiăng po pêi cheăng pakĭng long Xuân Hương, tơkŭm hên tơmeăm pêi lo ing chiâk deăng dêi Đà Lạt - Lâm Đồng vâ tơbleăng troh kuăn pơlê. Po kơchô tơ’mot hên vâ chê 50 khu tơrŭm cheăng, mâu ngế ƀă 90 khu tơbleăng tê mâu kơchâi, reăng, chế, kơphế, rơtế ƀă mâu tơmeăm pêi lo ing chiâk deăng OCOP ki hên, rơdêi dêi Đà Lạt - Lâm Đồng.

Nâ Trần Thị Thanh Huyền tối:

“A hmâ pêt to kơchâi, plâi pôm mâu tơmeăm ki hmâ pêt dêi Đà Lạt môi tiah hăng ro, hơpê lŭm prâp, kơtĕm kân prâp, pôm ló ngeăm, cần tây, hên mâu kơchâi plâi ki ê. Khu tơrrŭm cheăng kơjo kum hên, hlối in ăm á hlá mơ-éa chêh hnê, pro hdrối ăm pin troăng, trá tơdrá vâ pin bú tơbleăng tê dêi ƀă hên hĭn. A tơngah tơmeăm pêi lo dêi Đà Lạt châ tơbleăng ăm hên ngế ‘nâi’’. 

Rôh kố, Khu xiâm ngăn tê mơdró Lâm Đồng tơrŭm ƀă Vi ƀan pơlê kong kơdrâm Đà Lạt tơkŭm po tơbleăng, mơhno ƀă tê mâu tơmeăm pêi lo ai tĕm tem inâi “Đà Lạt - cho tíu ki lĕm ing tơnêi lĕm’’. Troh nôkố, pơlê kong kơdrâm Đà Lạt hiăng ăm hlá mơ-éa mơnhên inâi “Đà Lạt - cho tíu ki lĕm ing tơnêi lĕm’’ ăm 768 tíu pêi cheăng, khu tơrŭm, mâu ngế, ƀă 4 khu tơmeăm pêi lo, mê cho: Kơchâi, reăng, kơphế ƀă ôm hyô, ƀă 4 khu tơmeăm pêi lo mê cho: kơchâi, reăng, kơphế, pôm ƀă ôm hyô ngăn chiâk deăng. Inâi mê hiăng mơhno ăm hlo hên ngế vâ rôe xúa tung tơnêi têa ƀă kong têa ê, chôa ‘lâng mơhno cho môi inâi ki rơdêi.

Pôa Phạm Ngọc Thạch, Kăn hnê ngăn Hô̆i đong kuan trĭ khu pêi cheăng tơrŭm ‘na chiâk deăng tơkŭm Sunfood Đà Lạt ăm ‘nâi:

“Ngin rah xo tâi tâng mâu tơmeăm xuân ai xiâm ki pêt, tơmeăm châ Khu xiâm ngăn tê mơdró mơnhên tối nếo châ chêh ‘mot vâ tơbleăng tê ăm mơngế rôe xúa. Pakĭng mê, vâ tơbleăng inâi ăm mâu khu mơdró ngin hiăng pro môi mah QR Code, tơrŭm ƀă ƀă tơbleăng ăm trang thông tin. Pakĭng mê, ngin dế tơrŭm ƀă ing taxi, hngêi pế pơchên kế kâ troh hngêi ăm tơmối kâ koi ối pơtê  vâ mơhno tơbleăng um méa tâi tâng khu pêi cheăng Sunfood mê troh tơmối’’.

Khu tơkŭm po Festival reăng Đà Lạt rôh má 9 hơnăm 2022 xuân hiăng tơkŭm po hneăng Hôp tơpui ‘na khoa hok pơtối rak vế ki kơnía dêi inâi pơlê kong kơdrâm Festival reăng  Đà Lạt ƀă túa pêi cheăng dêi mơngế pơlê kong kơdrâm Đà Lạt ‘’Têm rơpiât- lĕm, pâ hlế kơ tơmối’’. Hneăng hôp hiăng  mơdoh hên chôu tối tơbleăng, chêh tơdroăng  kal vâ tơbleăng ƀă hnê tối rơtâ tá mâu tơdroăng ki kơnía dêi inâi pơlê kong kơdrâm Festival reăng Đà Lạt. Pôa Tôn Thiên San, Kăn hnê ngăn Vi ƀan pơlê kong kơdrâm Đà Lạt tối, ing tơdroăng pêi pro dêi Festival reăng Đà Lạt, tơdroăng pêt reăng hiăng châ ô eăng ƀă tối inâi reăng Đà Lạt cho ki rơdêi kal châ ’no liăn cheăng dêi kơvâ pêt reăng.

“Ing mâu tơdroăng pêi cheăng tiô khoa hok dêi rêm kơvâ cheăng, mâu hlá mơ-éa chêh ton nah, mâu tơdroăng chêh ‘na khoa hok châ tơpui tơno, tối nhên, mơnhên tơdroăng cheăng, ki pơxúa dêi inâi pơlê kong kơdrâm Festival reăng Đà Lạt ƀă túa pêi cheăng dêi mơngế Đà Lạt… Ngin loi khât tiah kố, tung la ngiâ pơlê kong kơdrâm Đà Lạt kô pơtối tơbleăng tơƀrê tơdroăng cheăng pêi, ki rơdêi dêi kong pơlê mơnhông tơƀrê, veăng ‘no hnoăng tơxâng a tơdroăng mơnhông cheăng kâ tơdjuôm dêi kơpong Tây Nguyên ƀă tung lâp tơnêi têa”.

Festival reăng Đà Lạt roh má 9 hơnăm 2022 ton troh tâi lơ 31/12, tơhrâ kô ai hên tơdroăng kal, tơdroăng ki ro tơviah ăm tơmối ƀă mâu kuăn pơlê a pơlê kong kơdrâm châ ngăn. Tung mê, mâu reăng ki nếo châ tơbleăng ‘măn rơtâ tá kơpong tơdế ki xiâm pơlê kong kơdrâm kô pơtối tơbleăng troh tâi Têt Lo hơnăm nếo.