VOV4.Xơ Đăng - Kơxê lơ 19/9, Hô̆i đong hnê ngăn kong pơlê Gia Lai tơkŭm po hneăng hôp má 7 ‘na tơdroăng, pêi pro pôk inâi Kăn hnê ngăn Vi ƀan kong pơlê. Akố, pôa Trương Hải Long, kăn phŏ pơkuâ ngăn Đảng Gia Lai châ 67/68 ngế kăn Hô̆i đong hnê ngăn kong pơlê pôk pro kăn hnê ngăn Vi ƀan kong pơlê Gia Lai pơla hơnăm 2021 – 2026. Pôa Trương Hải Long, kot mâ hơnăm 1976, pơlê xiâm a cheăm Yên Trung, tơring Yên Phong, kong pơlê Bắc Ninh, mot Đảng hơnăm 2004, hriâm klêi Hngêi trung Đại họ Khoa học Xã hội và Nhân văn, Đại học Ngoại ngữ (Đại học Quốc gia Hà Nội): hriâm Thak sih Luật ƀă Lý luận chính trị cao cấp, cử nhân Anh văn.

Pôa Hồ Văn Biên, kăn pơkuâ ngăn Đảng (‘na hơ’vá) diâp reăng, rơkâu pôa Long châ pôk pêi hnoăng cheăng ki nếo

Hdrối vâ châ pôk pro kăn hnê ngăn Vi ƀan kong pơlê Gia Lai, pôa Long hiăng pêi hên tơdroăng cheăng môi tiah: Kăn phŏ pơkuâ, kăn pơkuâ Kong chưk – Viên chưk, Khu xiâm ngăn kong pơlê ƀă hnoăng cheăng dêi mâu kăn ƀô̆; Ngế cheăng tung khu pơkuâ ngăn Đảng, kăn phŏ pơkuâ ngăn mâu kong pơlê ƀă hnoăng cheăng mâu kăn ƀô̆, châ pơkâ inâi pro Ngế xiâm ngăn kong pơlê ƀă hnoăng cheăng mâu kăn ƀô̆ pơla hơnăm 2021 – 2026 ƀă châ Khu xiâm ngăn tơdroăng kal kí pơkâ thế veăng tung Khu pơkuâ ngăn, Khu pơkuâ ngăn Đảng Gia Lai, pro kăn phŏ pơkuâ hnê ngăn Đảng a khế 9/2022.

Katarina Nga tơplôu ƀă tơbleăng