VOV4.Xơ Đăng - Mâu hơnăm hiăng hluâ, kơnôm kơxô̆ liăn mung ing troăng hơlâ kơjo ăm mung liăn, lối 225 rơpâu roh rơpŏng kơtiê, rơpŏng vâ chê kơtiê ƀă mâu ngế ai hnoăng tơnêi têa tung kong pơlê Gia Lai ai tơmeăm khoăng, tăng cheăng pêi, mơnhông mơdêk pêt mơjiâng tơmeăm, tơkâ hluâ kơlo kơtiê ƀă hluăn ing kơtiê krá tơniăn ton. Kơxô̆ liăn mung hiăng chiâng tíu tŏng kum hiâm mơno, kum mơngế kơtiê tơniăn tung tơdroăng rêh ối.

Rơpŏng ngoh Rơ Châm Tích, cho môi tung mâu rơpŏng a pơlê Lung Prông, cheăm Ia Kriêng, tơring Đức Cơ hiăng păng ‘nâng ‘’pơ’lêh’’ klêi kơ’nâi châ mung liăn a hngêi arak liăn. Ing rơpŏng pá puât, hngêi trăng pơchân, rơpŏng hiăng hluăn kơtiê, rơnêu hngêi trăng kân lĕm rơdâ. Ngoh Rơ Châm Tích, tối ‘na ki châ tơƀrê dêi kơxô̆ liăn ki tơná hiăng châ mung:

‘’Sap ing tơdah kơxô̆ liăn mung dêi hngêi arak liăn kum rêh ối pơlê pơla, rơpŏng á hiăng chía tâ iâ tung hên tơdroăng cheăng, mơnhông tơdroăng pêi cheăng rak ngăn plâi hôt, kơphế. Drêng tá hâi châ mung kơxô̆ liăn mê trâm hên pá puât, a hơnăm 2017 á pêt kơphế, kơ’nâi mê pêt plâi hôt, tơdroăng cheăng kâ tơniăn’’.

Nâ Kpă H’Nen, ối a tôh 9, pơlê kân Phú Thiện xo on veăng ƀă 5 sao klâng nôu pâ xing xoăng ăm. Xua ƀăng chiâk deăng kŭn, mơhé on veăng kơhnâ pêi laga xuân pá puât lăm pêi cheăng vâi rêm hâi vâ ai liăn kâ. Kơnôm tơdroăng tŏng kum dêi nhŏng o, pơlê, kơtâu, khu râ kăn pơkuâ, kơxô̆ liăn mung 30 rơtuh liăn ing ƀơrô pro mơ-éa ăm mung liăn Hngêi arak liăn kum rêh ối pơlê pơla tơring, nâ hiăng roê tơ’nôm chiâk deăng, pêt pôm ki ai châ hên.

Nâ Kpă H’Nen tối ăm ‘nâi, troh nôkố rơpŏng hiăng chêl tâi kơxô̆ liăn chĕn ki hên, tơdroăng rêh ối xuân hiăng tơniăn tâ.

‘’Hdrối nah rơpŏng á cho pá puât, drêng á châ mung liăn ngân dêi tơnêi têa, á hlo tơdroăng rêh ối á nôkố hôm tâ hdrối nah hên ‘nâng’’.

Ing kơxô̆ liăn mung kum rêh ối pơlê pơla, hên rơpŏng hdroâng kuăn ngo a Gia Lai hiăng mơ-eăm hlŭn ing kơtiê

Tiô Tíu pêi cheăng Hngêi arak liăn kum rêh ối pơlê pơla kong pơlê Gia Lai, tíu pêi cheăng hiăng pêi pro châ 17 tơdroăng ăm mung liăn kân ƀă kơxô̆ liăn ăm mung châ lối 16.800 rơtal liăn, kơxô̆ liăn chĕn a hngêi arak liăn troh khế 9 hơnăm kố châ vâ chê 5.800 rơtal liăn, dâng 400 rơpâu roh rơpŏng mung vâ mơ’no liăn mơnhông mơdêk pêt mơjiâng tơmeăm, kum pêi pro tơdroăng pơkâ xiâm tơnêi têa ‘na kơdroh kơtiê, mơjiâng thôn pơlê nếo tung kong pơlê.

Pôa Lê Văn Trí, Kăn pơkuâ hngêi arak liăn kum rêh ối pơlê pơla kong pơlê Gia Lai tối ăm ‘nâi, tung la ngiâ, hngêi rak liăn rak tơniăn 100% mơngế kơtiê ƀă  mơngế ai hnoăng tơnêi têa châ tŏng kum mung liăn dêi tơnêi têa, ƀă mâu pơkâ pêi la ngiâ dêi kong pơlê ‘na pơ’lêh cheăng kâ ƀă mơjiâng thôn pơlê nếo.

‘’Tung 20 hơnăm pêi pro tiô Pơkâ 78 hiăng mơnhên troăng pêi tơkŭm po ƀă  troăng pơkuâ kơxô̆ liăn châ tơƀrê. Hngêi arak liăn kum rêh ối pơlê pơla kong pơlê Gia Lai kô tơrŭm ƀă mâu tíu cheăng, khu cheăng, kơvâ cheăng, mâu khu cheăng kal kí rêh ối pơlê pơla vâ ăm mung liăn troh mơngế châ mung, tơkŭm tung tơdroăng pơkuâ, pơtâng tối kơxô̆ liăn ăm mung vâ mơnhông pêt mơjiâng tơmeăm, tơkŭm mâu troăng pơkuâ kơxô̆ liăn, pơtâng tối rơpŏng mung liăn vâ kum ăm mơngế kơtiê ƀă mâu ngế ai hnoăng tơnêi têa ki ê mơnhông mơdêk pêt mơjiâng tơmeăm, rak tơniăn tơdroăng rêh ối ƀă mơ-eăm hlŭn ing kơtiê krá tơniăn’’.

Nôkố, Gia Lai ai 91 cheăm châ plah thôn pơlê nếo, laga tung 46% pơ’leăng mâ mơngế cho mơngế hdroâng kuăn ngo, tơdroăng rêh ối, cheăng kâ xuân trâm hên pá puât. Ƀă tơdroăng ai khât mê, kơxô̆ liăn ăm mung rêh ối pơlê pơla xuân cho tíu tŏng kum châ tơƀrê, kum mâu thôn pơlê, ai tơ’nôm kơxô̆ liăn pêt mơjiâng tơmeăm. Mâu khu tơrŭm cheăng, khu râ tơdah hnoăng, ôh tá xê to djâ kơxô̆ liăn tro mơngế, mê ối kum ăm kuăn pơlê ‘nâi troăng pêi, hnê dêi pó kum dêi pó mơnhông mơdêk.

Hoàng Qui chêh

A Sa Ly tơplôu ƀă tơbleăng