Tiô tơbleăng a Hneăng hôp Khu pơkuâ cheăng Đảng ƀô̆ kong pơlê Gia Lai, roh má 12 (po rơdâ), kơlo mơnhông cheăng kâ dêi Gia Lai 6 khế hiăng hluâ châ 5,54% tâng pơchông ƀă roh kố hơnăm 2022. Mâu pơkâ tâi tâng xo hnoăng liăn tơnêi têa, mơjiâng tơmeăm kơmăi kơmok, pơtối châ 48,7 ƀă 44,6%; kơxô̆ khu tê mơdró kĭ vêh pêi cheăng ƀă kơxô̆ tơdroăng tơkêa mơ’no liăn cheăng tâk; pêi cheăng ôm hyô pơtối xông tơtêk têi.

Laga, hên tơring a Gia Lai xuân trâm pá puât tung xo hnoăng liăn xúa tơnêi chiâng ôh tá bê liăn ngân ăm mâu tơdroăng tơkêa bro mơ’no liăn; pá vâ po rơdâ pêt kong xua troăng pơkâ pêi nôkố tá hâi mơhnhôk, hrá tơbleăng pơkâ pêi xúa tơnêi; tơdroăng pêi pro mâu tơdroăng pơkâ xiâm tơnêi têa hrá, môi tiah Tơdroăng pơkâ xiâm tơnêi têa mơnhông cheăng kâ – rêh ối pơlê pơla kơpong kuăn pơlê hdroâng kuăn ngo ƀă kong ngo.

Krê kơvâ mơ’no liăn cheăng tơnêi têa, tâi khế 6/2023, kong pơlê nếo mơ’no liăn châ vâ chê 600 rơtal liăn tung tâi tâng kơxô̆ liăn 4.178 rơtal liăn mơ’no liăn cheăng tơnêi têa dêi hơnăm, châ 13,85%. Kố xuân cho kơvâ ki Vi ƀan kong pơlê Gia Lai ƀă mâu khu kơvâ cheăng dêi kong pơlê tơkŭm kơjo tơleăng tung la ngiâ. Vi ƀan kong pơlê Gia Lai xuân hiăng mơjiâng châ 3 tôh pêi cheăng vâ thăm séa ngăn, mơhnhôk, tơleăng tơdrêng mâu tơdroăng ki nếo ai.

Pôa Đinh Hữu Hoà – Kăn phŏ pơkuâ Khu pơkâ túa cheăng ƀă mơ’no liăn cheăng kong pơlê Gia Lai tối ăm ‘nâi:

“Mâu khu cheăng kơvâ cheăng veăng mơnhên ‘na mơ-éa kơchuâ bro, mơ-eăm iâ hâi mơnhên vâ tơbleăng tơdroăng tơkêa bro, tơniăn. Má pơtăm, cho Khu pơkuâ loăng pơlái kong kế ƀă kong prâi xuân kal tơbleăng Vi ƀan kong pơlê tah lôi tiú chiâ xo tơnêi vâ kum pêi pro tơdroăng tơkêa bro. Ƀă mâu tôh pêi cheăng, xuân kal pêi pro rĕng séa ngăn, tơrŭm ƀă mâu tơring tơbleăng kơ koan ai hnoăng vâ tơleăng vâ pro ti lâi pêi pro rĕng tơdroăng pơkâ pêi’’.

Xuân tung măng tĭng, Hô̆i đong kong pơlê Kon Tum tơkŭm po Hneăng hôp má 5 vâ tơpui tơno, mơnhên tơdroăng cheăng kâ – rêh ối pơlê pơla 6 khế apoăng hơnăm, mơnhên troăng prôk, hnoăng cheăng ki xiâm 6 khế mơ’nui hơnăm ƀă pơkâ mâu tơdroăng xiâm ối tung hnoăng.

Pơtối mê, 6 khế apoăng hơnăm kơlo tơtêk tâi tâng tơmeăm tung kong pơlê châ 6,8% tâng pơchông ƀă roh kố hơnăm hdrối, ối má 22/63 kong pơlê, pơlê kong kơdrâm tung lâp tơnêi têa ƀă hên má môi kơpong Tây Nguyên. Tung mê, kơpong kơmăi kơmok ƀă mơjiâng tơmeăm khoăng tâk 10,88%; pêi chiâk deăng, loăng pơlái kong kế ƀă ká xi xŏng tâk 5,65%;  tê mơdró tâk 5,31%.

Mơhé Kon Tum ai kơlo tơtêk hên má môi kơpong Tây Nguyên, laga xuân ối iâ tâ tâng pơchông ƀă pơkâ tâk 10% ki kong pơlê pơkâ mơ’no tung hơnăm kố. Pakĭng mê, 6 khế apoăng hơnăm xo hnoăng kuăn ngân tơnêi têa châ vâ chê 1.840 rơtal liăn bu châ 41% pơkâ pêi; tơdroăng tăng tơnêi mâu tơdroăng tơkêa bro, tơmeăm ki kal xiâm xuân ối trâm pá puât ƀă hía hé.

Xông tơpui pơxiâm po hneăng hôp, pôa Dương Văn Trang, Kăn cheăng tung Khu xiâm Đảng, Kăn pơkuâ hnê ngăn cheăng Đảng kong pơlê, Kăn hnê ngăn Hô̆i đong kong pơlê Kon Tum tối, kal ai troăng pêi kơtăng tâ ‘mâi rơnêu, pro tơniăn tơdrêng mâu tơdroăng ki tá hâi tro, ki má lối cho tơdroăng kheăn hôu tá hâi kơtăng; ví, trut ăm dêi pó, xâu pôu râng hnoăng cheăng dêi mâu khu kăn ƀô̆, kŏng chưk tung pêi cheăng... vâ kum pêi kêi đeăng mâu tơdroăng ƀlêi trâng mâu pơkâ, túa pơkâ pêi cheăng kâ – rêh ối pơlê pơla hơnăm 2023:

“Mâu kăn teăng mâ Hô̆i đong kong pơlê tơkŭm mơnhên tơdroăng ôh tá tơdjâk pa kong, tơdrăng ‘na tơdroăng châ tơƀrê, mâu tơdroăng ối pá puât tung pêi pro pơkâ cheăng kâ – rêh ối pơlê pơla ƀă ivá kêi đeăng mâu pơkâ tơtêk dêi plâ hơnăm 2023, ki má lối cho mơhnhôk mơ’no liăn cheăng, mơ’no liăn cheăng tơnêi têa ƀă pêi pro tơdroăng pơkâ xiâm tơnêi têa.

Mơnhên xiâm kối ki tơdjâk pa kong, ing tơná tá tung tơdroăng tơbleăng mơ-éa ki nhên mâu troăng hơlâ dêi Tơnêi têa ƀă tơdroăng pêi pro, tơkŭm po pêi pro a mâu râ, mâu kơvâ cheăng’’.

Xuân a Hneăng hôp má 5, Hô̆i đong kong pơlê Kon Tum hneăng má XII, hneăng hơnăm 2021 – 2026 hiăng séa ngăn, pơkâ ƀă 32 tơdroăng xiâm Viƀan kong pơlê tơbleăng a hneăng hôp, tung mê ai mâu troăng hơlâ ki kal, môi tiah: kơlo tŏng kum vâ pêi pro Tơdroăng xĕn kuăn pơlê rêh ối mâu kơpong kong prâi pro ôh tá tơniăn, ki rơhêng vâ tối kơpong pá puât, tơkăng kong, kuăn pơlê ki xĕn ối hmâng vâ, kơpong kong xúa pro tơmeăm khoăng dêi kong pơlê; xing xoăng kơxô̆ liăn mơnhông tơrŭm cheăng; hơ’lêh pơkâ pêi mâu troăng pơkâ tơnêi têa hơnăm 2022, 2023 ƀă tối hdrối troăng xing xoăng tơdroăng pơkâ mơ’no liăn cheăng tơnêi têa hơnăm 2024.