VOV4.Xơ Đăng - Kơmăng lơ 26/7, a Ilâng kiâ mô đô̆i kong pơlê, Vi ƀan kong pơlê Gia Lai tơkŭm po leh chôu nhâng ƀă têk on trĭng tơbâ mâu ngoh khên tơnôu hlâ tung tơplâ xâ.

Mô đô̆i hneăng hdrối nah chôu nhang tơbâ mâu khu pú hlâ tung tơplâ xâ nah

Tung tơdroăng tơkŭm po kân krip, mâu kăn teăng mâ rơtế kơdrâm đoân viên droh rơtăm dêi kong pơlê Gia Lai hiăng kon ko nhuô̆m pâ, pleăng hơvĭng reăng, chôu nhâng, tơbâ hnoăng kân kĭn dêi mâu ngoh khên tơnôu hlâ tung tơplâ xâ hiăng khên tơnôu pleăng châ chăn mơheăm chhá xua tơniăn krê, tơniăn lĕm dêi Tơnêi têa, xua tơdroăng mơjiâng ƀă gâk kring tơnêi têa.

Klêi kơ’nâi leh pôu ngăn, mâu kăn pơkuâ kong pơlê, kơ koan, kơvâ cheăng, khu râ, khu cheăng lêng, đoân viên, droh rơtăm, mâu râ kuăn pơlê hiăng troh chôu nhâng, tĕk on trĭng ƀă pleăng hơvĭng reăng mâu tơnâp kiâ mô đô̆i a ilâng kiâ.

A Sa Ly tơplôu ƀă tơbleăng