Nâ Th. môi ngế kơdrâi ối a bêng Tây Sơn, pơlê kong kơdrâm Plei Ku nếo lăm pôu a Ƀơrô kring ngăn tơniăn tung măng ƀă hbrâ mơdât khu ‘mêi ki ai xôi xúa kơmăi ki dâi lĕm, troh a Kŏng an kong pơlê Gia Lai tối tơdroăng tro hlôp khu ‘mêi hêak pơloi 160 rơtuh liăn. Kơtăn kố 2 hâi, nâ tâng phôn krếo tơbleăng châ mơhá môi iâ tơmeăm xua hdrối mê lăm rôe tơmeăm a siêu thị điện máy.

Vâ châ xo tơmeăm hbru ăm, nâ Th. thế tải app Telegram a phôn râng kŏng tơná vâ tơlêi drêng tơpui ƀă. Tiô rơkong ngế ki hêa hnê tối, nâ tiê a mâu troăng link vâ rah tơmeăm, ƀă rêm hdroh sap 10.000 liăn troh a 40 rơpâu liăn. Drêng hlo nâ hiăng loi, khu ‘mêi thế nâ pơtroh kơxô̆ liăn hên vâ ‘no liăn pêi cheăng, rơkâ gá sap 40 troh 60%.

Tung hâi lơ 11/5, nâ hiăng ai 10 hdrôh xúa tài khoản krê dêi tơná vâ pơtroh lối 160 rơtuh liăn a 2 tài khoản, klêi mê nếo châ ‘nâi tơná tro vâi hêak pơloi. Tiô ăm ‘nâi apoăng hơnăm 2023, a kong pơlê Gia Lai hiăng ai ngế tro hlôp vâi hêa pơloi troh 3,5 rơtal liăn. Pakĭng tơdroăng ki vâi heâk pơloi túa ki nếo, mâu tơdroăng heâk pơloi tiah ton mê cho tơbro tối dêi tơná kŏng an tơbleăng tối vâi ai xôi, mơnhâu vâ khoă sim, khoă tài khoản, pơtroh liăn vâ séa ngăn; hêak pơloi dêi tơná cho mơngế kong têa ê pro hmâ ƀă, hlối hbru tơmeăm; tăng mơngế cheăng tê tơmeăm, pơkâ tối mơhá ăm liăn hên; krếo ‘no liăn cheăng; ăm  mung liăn online... xuân châ mâu ki ‘mêi hêak pơloi ‘’ la xuân ối hên kuăn pơlê rĕng loi, tro hlôp vâi.

Tung hơnăm 2022, mâu Khu kring tơniăn tung măng kong pơlê Gia Lai, châ xo ai 124 tin nhắn tối ‘na hêak pơloi ƀă tâi tâng kơxô̆ liăn lối 40 rơtal liăn. Ngế ki tro khu ‘mêi hêak pơloi kâ liăn  hên má môi châ lối 10 rơtal liăn.