Hbrâ troh hneăng tơ’noăng trung hok phôh thong Tơnêi têa hơnăm 2023, kơvâ hnê hriâm kong pơlê Gia Lai dế thăm séa ngăn, tơniăn hneăng tơ’noăng trung hok phôh thong Tơnêi têa 2023 tơkŭm po tơniăn, kơtăng. Hneăng tơ’noăng râ má pái phôh thong Tơnêi têa hơnăm kố, lâp kong pơlê Gia Lai ai lối 15.200 ngế hok tro veăng tơ’noăng; tung mê, ai vâ chê 14.300 ngế hok tro hriâm phôh thông, 483 ngế hriâm đi đo, ki ê cho hok tro pakong. 

Tung tâi tâng kơxô̆ hok tro kĭ veăng tơ’noăng ai lối 14.000 ngế hok tro kĭ mot đăi hok, cao đẳng. Hbrâ ăm hneăng tơ’noăng, kong pơlê Gia Lai hiăng tơkŭm po ƀă 41 tíu tơ’noăng ki păng ‘nâng (tâk 1 kơbong tâng pơchông ƀă hơnăm 2022) ƀă 17 tíu tơ’noăng ki hbrâ ƀă 652 kơbong tơ’noăng, pơtroh dâng 2500 ngế kăn ƀô̆, thái cô, nhân viên veăng tung mâu khu dêi hô̆i đong tơ’noăng.

Pôa Nguyễn Văn Long, Kăn phŏ pơkuâ hnê hriâm ƀă hnê mơjiâng kong pơlê Gia Lai tối ăm ‘nâi, nôkố, khu hiăng hnê mơhno mâu hngêi trung kêi đeăng tơdroăng hnê hriâm phôh thông tiô tro pơkâ pêi.