A pơlê kong kơdrâm Quy Nhơn, tíu po leh pơxiâm dêi hơnăm Hôm hyô Tơnêi têa - Gia Lai hơnăm 2026, mâu tíu ối pơtê hiăng hbrâ tí tăng ngăn mâu tơmeăm vâ tơpâ mơdât on chếo. A Anya Premier Hotel Quy Nhơn, Tíu ăm tơmối kâ koi ối pơtê hiăng séa ngăn kơmăi tơmeăm tơbleăng on chếo, tíu xiâm pêi ngăn, troăng vâ kơtâu drêng xâu rơ-iô xuân môi tiah tơmeăm ki hbrâ drêng ai tơdroăng pêi tơdrêng.

Thươ̆ng tă Đậu Văn Huy - Phŏ Ƀơrô Kăn sát tơpâ mơdât on chếo dêi Kong an kong pơlê Gia Lai tối nhên, tơdroăng tơmâng khât ‘na hbrâ mơdât on chếo ôh ti xê to tơdroăng cheăng pêi krê dêi mâu khu râ pơkuâ cheăng, mê ối cho hnoăng cheăng pêi tơdjuôm dêi rêm tíu pêi cheăng, rêm ngế pêi cheăng vâ veăng ‘no hnoăng mơjiâng um méa Gia Lai cho tíu ki troh tơniăn, hlối hmâ. Tung măng tĭng pơxiâm po Ôm hyô Tơnêi têa 2026 a Gia Lai, kong pơlê kô tơdah dâng 70 rơpâu ngế tơmối, vâ pro tơniăn kân. Tơdroăng hbrâ ing apoăng, ing hơngế ƀă tơdrêng, kô gum tơmối hmiân tuăn drêng troh a Gia Lai.