VOV4.XơĐăng - Kong pơlê Gia Lai nôkố ai lối 12 rơpâu ngế ki ai hnoăng ƀă kăch măng dế châ kâ liăn tŏng kum. Drêng tơbâ  75 hơnăm hâi mố đô̆i rong râ, hlâ hía lơ 27/7, rơtế ƀă kế tơmeăm dêi kăn xiâm hnê ngăn tơnêi têa ai lối 3 rơtal 600 rơtuh liăn, Vi ƀan hnê ngăn kong pơlê Gia Lai hiăng xo hdrối lối 1 rơtal liăn vâ tơkŭm lăm pôu kơ-êng ƀă hbru tơmeăm ăm mâu rơpŏng ki ai troăng hơlâ tŏng kum ƀă mâu ngế ki ai hnoăng ƀă kăch măng.

Kăn pơkuâ kong pơlê Gia Lai troh pôu kơ-êng Nôu Việt Nam khên tơnôu drêng tơbâ 75 hơnăm hâi mố đô̆i rong râ, hlâ hía

Tung mê, kăn ƀô̆ kăch măng hdrối nah, Ngoh khên tơnôu tung pêi cheăng tung rôh tơplâ, mố đô̆i tro rong, ngế ki ai hnoăng ƀă kăch măng châ xo kơlo tơmeăm kơnâ 300 rơpâu liăn. Mâu nôu khên tơnôu Việt Nam, mố đô̆i tro rong ki ôh tá chiâng pêi cheăng lối 81% rơpŏng nhŏng o mâu mố đô̆i ki hlâ ai tơdroăng rêh ối xơpá châ xo tơmeăm kơnâ 600 rơpâu liăn.

Katarina Nga tơplôu ƀă tơbleăng