VOV4.Xơ Đăng - Hơnăm hriâm 2022-2023, kơvâ ngăn ‘na hnê hriâm ƀă hnê mơjiâng tuăn ngoâ rơkê kong pơlê Gia Lai dế ôí kal 3 rơpâu 700 ngế thái cô vâ hnê. Drêng hlo ai tơdroăng ki pá puât mê, hên troăng hơlâ ki kal athế pêi pro tơdrêng, hiăng châ rêm râ hnê ngăn ‘na hnê hriâm pơkâ pêi pro vâ tơniăn ăm tơdroăng tŭm mâu thái cô hnê chư ƀă tơniăn ăm hok tro vâ mơhriâm tung hơnăm hriâm nếo.

Tung hơnăm hriâm nếo kố, Hngêi trung Mầm non Hoa Hồng, pơlê kong kơdrâm Plei Ku hiăng tơdah 850 ngế hok tro mot hriâm tung lối 22 khu lâm. Cô Trần Thị Thuỷ, Kăn pơkuâ hngê trung Mầm non Hoa Hồng tối ăm ‘nâi, hngêi trung dế kal pá 15 ngế cô hnê a hơnăm hriâm nếo kố, xua mê tơmiât tô tuăn ƀă préa ‘nâng:

‘’Dế nôkố, hngêi trung bu xiâm ai 22 ngế cô hnê, tơniăn 1 to lâm ai 1 ngế cô hnê, ki u ối ăm mâu cô hnê mâu hok tro 5 hơnăm, ƀă mâu hok tro 3 troh 4 hơnăm dế nôkố tá hâi teăm bê cô ki hnê. Ngin xuân hiăng tối tơdroăng kố troh a ƀơrô hnê hriâm ƀă Vi ƀan hnê ngăn pơlê kong kơdrâm klêi kơ’nâi mot hơnăm hriâm nếo athế bê tŭm cô hnê vâ păn roăng, rak ngăn, hnối hnê mâu vâi muăn hdrêng’’.

Pôa Phạm Văn Đại, Kăn Ƀơrô Hnê hriâm ƀă hnê mơjiâng tuăn ngôa rơkê dêi tơring Ia Grai tối ăm ‘nâi: Lâp tơring ai 46 hngêi trung hriâm, ai lối 1.200 ngế kăn ƀô̆, thái cô ƀă mâu ngế ki pêi cheăng tung hngêi trung. A chôu phut kố, tơring Ia Grai ối kal vâ chê 300 ngế thái cô, mâu ngế ki cheăng tung hngêi trung.

Pêi pro tiô tơdroăng pơkâ dêi kơvâ hnê hriâm phôh thong tâi tâng hơnăm 2018, hơnăm hriâm 2022-2023 cho hơnăm ki apoăng hriâm nal Ănglê ƀă Tin hok, mê cho peá môn ki pơkal athế hriâm sap ing lâm 3 a râ má môi, ôh tá xê môn ki tí tăng rah xêh vâ hriâm tiah hdrối nah. Ing tơdroăng ki mê, pro tơring ki ôh tá bê thái cô pơtối trâm tơdroăng pá puât drêng tá hâi teăm ai tŭm kơxô̆ thái cô ki hnê ƀă 2 môn ki kố.

‘’Dế nôkố, ki pá puât dêi kơvâ hnê hriâm tơring Ia Grai mê cho hriâm tiô hlá mơ-eá ki nếo, mê cho khu kơxop hlá mơ-eá nâl Ănglê lâm 2 ƀă tin hok lâm 3 dế nôkố cho tá hâi teăm bê tŭm. Ƀă tâi tâng kơxô̆ thái cô ki hnê nâl Ănglê xuân tá hâi teăm tŭm, tơkeá vâ tối 5 to hngêi trung tá hâi teăm ai thái cô hnê nâl Ănglê ƀă 8 to hngêi trung tá hâi teăm ai thái cô hnê nâl tin hok, xua mê trâm hên xahpá’’.

Xuân tung hơnăm kố, pơlê kong kơdrâm Plei Ku ối kal pá 600 ngê thái cô hnê a mâu râ má môi. Pôa Nguyễn Đình Thức, Kăn ƀơrô Hnê hriâm ƀă hnê mơjiâng tuăn ngôa rơkê pơlê kong kơdrâm Plei Ku tối ăm ‘nâi, vâ kơ tơniăn tơdroăng hnê hriâm, kơvâ hnê hriâm kal tơkŭm pêi pro mâu tơdroăng ki ’mâi rơnêu pơcháu hnoăng cheăng ăm mâu thái cô a mâu hngêi trung.

Rak tơniăn hok tro a hngêi trung cho môi troăng hơlâ ki vâ kơdroh iâ xahpá xua ôh tá tŭm thái cô hnê tung hơnăm hriâm nếo a Gia Lai

Tơdrêng amê, ngăn tiô kơ mâu thái cô ki hiăng châ ƀiên chê̆ hnê ton hơnăm kô xing xoăng hnoăng cheăng hdrối, klêi mê, ƀă mâu môn tá hâi teăm ai thái cô hnê, mâu ngế pêi cheăng tung hngêi trung xuân kal athế tí tăng rah vâ tŭm mơngế hnê ƀă pêi cheăng.

‘’Ƀơrô hiăng pêi cheăng ƀă mâu hngêi trung vâ tí tăng seá mơnhên ngăn ‘na mâu hngêi trung, mâu lâm ƀă hnối tăng rah thái cô vâ hnê a mâu hngêi trung ki mê. Drêng ôh tá bê tŭm thái cô hên tiah mê, drêng tơpui tơno ƀă mâu thái cô pơkuâ ngăn hngêi trung, mê kal athế ‘mâi xing xoăng, hriâm tơdjuôm pơla mâu lâm ki tơdâng dêi pó, vâ pôi tá po lối hên lâm la ôh ta ai tŭm thái cô hnê.

Ƀơrô xuân hiăng pâ thế khu râ kơpêng seá ngăn tiô kơ tơdroăng pơkâ dêi kơvâ cheăng hnê hriâm, dêi tơnêi têa vâ kơ ai tŭm thái cô hnê, mâu ngế pêi cheăng tung hngêi trung, vâ tơ’lêi tơniăn tâ iâ tung hơnăm hriâm nếo kố’’.

Pôa Lê Duy Định, Kăn pơkuâ ‘na hnê hriâm ƀă hnê mơjiâng tuăn ngôa rơkê dêi kong pơlê Gia Lai tối ăm ‘nâi: Khu ngăn ‘na hnê hriâm ƀă hnê mơjiâng tuăn ngôa rơkê kong pơlê dế tơrŭm ƀă Khu ngăn ‘na kăn ƀô̆ dêi kong pơlê vâ ‘mâi pơkâ tơdroăng xing xoăng, tăng rah mâu thái cô, mơngế cheăng tung hngêi trung, po lâm, tơkŭm lâm hriâm, ai troăng hơlâ mơhnhôk mâu hok tro mot hriâm a rêm râ. Klêi kơ’nâi pêi pro klêi mâu tơdroăng ki mê, kô khŏm ai tŭm 1 rơpâu 344 ngế thái cô tiô kơ tơnêi têa hiăng pơcháu.

‘’Ƀă mâu lâm râ má môi athế ai 35 ngế hok tro 1 lâm, ƀă mâu râ má péa athế ai 35 ngế hok tro môi lâm. Rêm tơring kô athế ối pơkâ tơdroăng ki tơ’mot tơkŭm mâu hngêi trung, mâu lâm, rak tơniăn kơxô̆ pơ’leăng mâ hok tro hriâm, vâ kơ chía tá ai tơdroăng ki ôh tá bê thái cô vâ hnê. Drêng hiăng châ tăng tơ’nôm thái cô, hnối ‘mot tơkŭm mâu hngêi trung, ‘mâi xing xoăng hok tro hriâm mê tơdroăng hnê hriâm a kong pơlê Gia Lai tơngah kô bê tŭm thái cô vâ hnê, klêi mê ah, tơdroăng hnê hriâm dêi kong pơlê kô chiá tơniăn tâ iâ’’.

Hoàng Qui chêh

Nhat Lisa tơplôu ƀă tơbleăng