VOV4.Xơ Đăng - Kơchơ tê mơdró kơƀăn Trung thu a Gia Lai xuân hiăng kơdrâm phiu ro ƀă hên mâu tơmeăm tŭm túa, lĕm mơnâ mâ ngăn. Hơnăm kố, mâu khu ki mơjiâng pro tê tung kơchơ hên túa kơƀăn ing rơpâ liăn troh kơnâ liăn, tơxâng tơdroăng kal vâ dêi mơngế ki vâ rôe.

Hơnăm kố, tơdroăng tê kơƀăn Trung thu châ rĕng tơbleăng tê tâ. Ing apoăng khế 7 âm lĭt, riân tiô mâ khế, hên mâu tíu ai inâi ki vâi ô eăng pro kơƀăn môi tiah Kinh Đô, Yến sào Khánh Hòa, Richy ƀă hía hé hiăng pro tíu tơbleăng tê kơƀăn drô kĭng troăng kân dêi pơlê kong kơdrâm Plei Ku, tơ’mot hên tơmối troh lăm rôe. Rêm hơnăm, kơƀăn ki tê rôe ing kong têa Malaysia, Đài Loan châ tơbleăng tê a kơpêng tíu ‘măn tơbleăng tê mâu tơmeăm.

La hơnăm kố hên tíu tơbleăng tê kơƀăn dêi tơnêi pin mơjiâng pro. Yă kơƀăn Trung thu hơnăm kố ing 280 rơpâu liăn troh 480 rơpâu liăn môi kơ-hôp kơƀăn to hơto kơƀăn ki hmâ pro rêm hơnăm, kơƀăn ki kơnâ ai yă 560 rơpâu troh  a 1,7 rơtuh liăn.

Tiô nâ Bùi Thị Thúy Oanh, cheăng tê kơƀăn Thúy Oanh, bêng Diên Hồng, pơlê kong kơdrâm Plei Ku, pakĭng hên túa tĕm têp inâi yă tê kơƀăn Trung thu, hơnăm kố xuân ai to kơnâ yă xua yă rôe tơmeăm vâ pro kơƀăn to kơnâ mê chiâng kơnâ tâ rêm hơnăm.

‘’Ngăn tiô kơ tơmối. Pơtih kơƀăn ki tâ tung kơhôp  yă gá tơ ê há, ‘na kơƀăn ki tơbleăng tê tơmối,  tơpéa to tá yă tơ-ê há, ngăn tiô kơ túa kơƀăn. Vâ tối yă tê hơnăm kố kơnâ tâ iâ, ai túa kơƀăn ki ‘nâ môi hrĭng to lâi hlối ƀă môi kơhôp kơƀăn ki ‘nâ xuân châ péa pái hrĭng’’.

Tơmối tăng rôe kơƀăn Trung thu a pơlê kong kơdrâm Plei Ku

Nâ Bùi Thị Lành, ngế pơkuâ tíu tơbleăng tê kơƀăn Trung thu Yến Sào Khánh Hòa (tíu tê a 127 Phan Đình Phùng. Pơlê kong kơdrâm Plei Ku) ăm ‘nâi, tíu tơbleăng tê dêi  nâ tê 10 túa kơƀăn Trung thu ƀă yă tê a kơlo 65 rơpâu troh  110 ropâu liăn môi to, ing 148 rơpâu troh 657 rơpâu kiăn môi kơ hôp tŭm túa, kơhôp kơƀăn ki vâ rôe ăm dêi rơpó túa ki kơnâ ai yă môi rơtuh péa troh môi rơtuh tơpah hrĭng rơtuh liăn.

Xuân tiô nâ Lành, ‘nâi tơdroăng mơngế vâ rôe, rêm hơnăm tíu tê dêi nâ Lành ai tơ’nôm môi túa kơƀăn Trung thu ki nếo va tơmối ki rôe rah vâ rôe xêh túa kơƀăn ki lâi:

“Hơnăm kố kơƀăn peăng á ai pro tơ’nôm 2 túa ki nếo, tơvât hên kế râm hên kế vâ kâ tâ lĕm hơ-iâ mê ai râm phô-mai, ‘na kơƀăn ki pro ăm rơpâ mê ai râm tơ’nôm kế ăm xú hlá chế’’.

Khu rak ngăn tê mơdró kong pơlê Gia Lai hiăng hnê mơhno ăm mâu Khu rak ngăn tơdroăng tê mơdró mơdêk hnoăng cheăng séa ngăn tơmeăm pro kơƀăn Trung thu, vâ ‘nâi xiâm rêi pro. Tơdrêng amê pơxâu phâk mâu tíu pro kơƀăn ôh tá lĕm, ôh tá krúa, ôh tá chêh ăm ‘nâi xiâm rêi ki pro. Ôh tá tơniăn ki pơkâ thế pro krúa lĕm kế kâ, cho kế kâ ki pro kâ tung rôh Têt Trung thu.

Pôa Lê Hồng Hà, Ngế xiâm ngăn ‘na tơdroăng tê mơdró kong pơlê Gia Lai ăm ‘nâi:

‘’Ing pơla kố ngin hiăng tơkŭm pêi tơdroăng tơbleăng séa ngăn, tí tăng ngăn tơdroăng ki tơdjâk troh pêi pro kơƀăn Trung thu hơnăm 2022 vâ mơdât tơdroăng tê kơƀăn trung thu ki ôh tá ‘nâi xiâm mơjiâng pro ah lơ pro tơdjâk troh ki ôh tá krúa kế kâ dêi kuăn pơlê. Pakĭng mê mơdêk séa ngăn tâi tâng mâu tơmeăm tê tơdjâk troh tơmeăm xúa tối tơdjuôm vâ teăm châ ‘nâi hlối pơxâu phâk kơtăng ƀă mâu ngế ki ai xôi ƀă mâu khu mâu ngế ki tê mơdró tung kong pơlê vâ pro pơxúa ăm mâu ngế ki rôe xúa.

Hoàng Qui chêh

Gương tơplôu ƀă tơbleăng