VOV4.Xơ Đăng - Pôa Nguyễn Văn Độ, Kăn xiâm hnê ngăn Vi ƀan cheăm Ia Me, tơring Čư Prông, kong pơlê Gia Lai ăm ‘nâi, a kơmăng lơ 25/8, tíu pêi cheăng hiăng lăm pôu, hơlêm ƀă kum ăm rơpŏng ki ai 2 ngế hlâ xua tro tơro têa. Hdrối mê, kơxo lơ 25/8, môi khu 4 ngế rơtăm ối a pơlê Xom, cheăm Ia Me, mê ai: ngoh Kpă Tuyên (kot mâ hơnăm 1985); Siu Béo kot mâ hơnăm 1992; Rơ Mah Đuôm kot mâ hơnăm 1983; Rơmah Hoang kot mâ hơnăm 1998 lăm a chiâk a kơpong têa krông dêi Đê Sơ, cheăm Ia Me.

Mâu kăn hnê ngăn Vi ƀan cheăm Ia Me troh hơlêm rơpŏng hngêi ai ngế hlâ xua tro tơro têa

Troh dâng 14 chôu 30 phut hâi ki mê, kong mêi kân mê 4 ngế dế kơtâu vâ hmuâ a hơpăm vâ hmuâ kơ mêi. Drêng mê, kơdrâ tơro têa mơdêi a kơpong ai hơpăm pro Kpă Tuyên ƀă Siu Béo hlâ hlối, Đuôm ƀă Hoang mơhúa hiăng teăm kơtâu mot tung hơpăm, mơhúa ôh tá ai tro rong ki klâ. Tâng tối, khu râ pơkuâ cheăng hiăng troh amê djâ châ prế ki hlâ prếo vêh a hngêi, tŭm prế ki hlâ mê pơrá ối tung rơpŏng hngêi xơpá.

Gương tơplôu ƀă tơbleăng