VOV4.Xơ Đăng - Tơdroăng cheăng kâ – rêh ối pơlê pơla kong pơlê Gia Lai 9 khế hơnăm 2022 ai hên tơdroăng ki pro tơniăn rơdêi. Tung mê, kơxô̆ khu tê mơdró mơjiâng nếo ƀă tơdroăng mơhnhôk mơ’no liăn cheăng, pơrá châ tơƀrê hên. Sap apoăng hơnăm troh nôkố, a kong pơlê Gia Lai ai lối 740 khu tê mơdró châ mơjiâng nếo (tâk vâ chê 17% tâng pơchông ƀă roh kố hơnăm 2021), ƀă tâi tâng kơxô̆ liăn kĭ tơkêa lối 7.400 rơtal liăn.

Gia Lai: Khu mơ’no liăn cheăng tơniăn, khu tê mơdró nếo tâk hên

‘Na mơhnhôk mơ’no liăn cheăng, Viƀan kong pơlê Gia Lai kĭ troăng hơlâ mơ’no liăn cheăng ăm 6 tơdroăng tơkêa bro, ƀă tâi tâng kơxô̆ liăn lối 600 rơtal liăn. 15 tơdroăng tơkêa bro ki ê, tâi tâng kơxô̆ liăn lối 3.400 rơtal liăn hiăng pêi kêi đeăng pro mơ-éa, dế châ kong pơlê séa ngăn.

Tiô pôa Nguyễn Hữu Quế - Kăn pơkuâ Khu pơkâ túa cheăng ƀă mơ’no liăn cheăng kong pơlê Gia Lai, vâ tíu mơ’no liăn cheăng tơdrăng lĕm, tơdâng tơ’mô tâ, kong pơlê rế thăm pêi pro rơdêi tơdroăng pơ’lêh pro mơ-éa, tơdrêng amê khŏm xo tơvêh tơdroăng tơkêa bro pêi pro ôh tá tro tơkêa.

VOV Tây Nguyên/Tơplôu: A Sa Ly