Po tung pơla 2 hâi (sap ing hâi lơ 4 troh lơ 6/11), Tíu ‘măn rak kế tơmeăm kong pơlê Gia Lai po Hâi mơdĭng kế tơmeăm mơhno túa lĕm tro hơnăm 2022 a plông dêi tíu ‘măn rak kế tơmeăm. Veăng a hâi mơdĭng ai mâu khu ngê̆ thuât, khu ngê̆ nhân dêi mâu hdroâng kuăn ngo Tây Nguyên ƀă Tây Bắc dế rêh ối a kong pơlê. Hâi mơdĭng kố ƀă hên hĭn mâu tơdroăng pêi pro ngê̆ thuât môi tiah: tŏn chêng koăng, kơxuâng, vêh bro mâu tơdroăng dêi khôi túa ton nah chêng koăng Tây Nguyên; mơđah tơbleăng rơxuâng sạp, rơxuâng xòe dêi mơngế Mường, mơdĭng kơxuâng diâp hơnăm hiăng kêi dêi hdroâng Tầy, Nùng; kơhnhon xuăng hlŭm khiê̆n ƀă hlŭm rơvŏng dêi mơngế Mường.

A hâi mơdĭng khôi hmâ mơđah tơbleăng ối ai mơđah tơbleăng kế tơmeăm hdroâng kuăn ngo, kơbong  mơđah tơbleăng kế tơmeăm rôh nah. Hâi mơdĭng kế tơmeăm hơnăm2022 cho tơdroăng cheăng tơmiât troh rak vế ƀă mơdêk kế tơmeăm mơhno túa lĕm tro dêi mâu hdroâng kuăn ngo dế rêh ối a kong pơlê Gia Lai, ing mê mơđah tơbleăng um méa tơnêi ƀă kuăn mơngế Gia Lai, kum mơdêk mơnhông ôm hyô kong pơlê.