Hôp tối mâu tơdroăng tơrŭm cheăng pơla hơnăm 2021-2025, pakĭng mê, môi tuăn tiô troăng hơlâ pơla hơnăm 2026-2030. Tung pơla hdrối kố nah, tơrŭm cheăng pơla Gia Lai ƀă mâu kong pơlê peăng Hdroh kong têa Lếo mơnhông tŭm tơdroăng, pêi châ hên ki tơƀrê. Gia Lai hiăng ăm 320 hnoăng liăn hriâm, rêm hơnăm ai lối 100 ngế hok tro Lếo troh hriâm a kong pơlê.

‘Na ‘no liăn mơjiâng tơmeăm khoăng, 15 khu mơdró a Gia Lai tơbleăng pêi tơdroăng tơkêa bro a peăng Hdroh kong têa Lếo ƀă tâi tâng lối 595 rơtuh dollars. Kong pơlê xuân kơjo kum dâng 60 rơtal liăn mơjiâng pro mâu tơmeăm khoăng tơrŭm tơrôa. A roh hôp, mâu kăn kong pơlê Gia Lai ƀă kăn pơkuâ ngăn 4 to kong pơlê peăng Hdroh kong têa Lếo hiăng kĭ tung hlá mơ-eá chôu pâ tơrŭm cheăng pơla hơnăm 2026-2030, ƀă troăng hơlâ pêi la ngiâ pơtối mơdêk tơrŭm tŭm tơdroăng, tơkŭm hên a mâu kơvâ hnê hriâm, pơkeăng pơlât, pêi chiâk deăng, tê mơdró, ‘no liăn mơjiâng tơmeăm khoăng, ‘no liăn cheăng, trâm tơpui tơno túa lĕm tro ƀă mơnhông ôm hyô.