Tiô tối tơbleăng, môi khế hdrối, râ ủy, mâu kăn cheăm a Gia Lai hiăng teăm pơkâ hlá mơ-éa hnê mơhno, pơkuâ cheăng; pê klêi tơdroăng cheăng ‘na xoăng mơngế pêi cheăng, tíu pêi cheăng ƀă tơmeăm vâ pêi cheăng a Mâu tíu xiâm pêi cheăng tơdah kuăn pơlê lăm pro hlá mơ-éa.

Tíu pêi cheăng tơdah hồ sơ a mâu tíu pêi cheăng mê pêi tơƀrê, ai lối 163.000 hồ sơ hiăng châ tơdah xo; kơxô̆ hlá mơ-éa ki châ pro klêi tro hâi khế pơkâ ai 97,65%... Laga, troh nôkố mâu hlá mơ-éa  hnê pêi ƀă râ cheăm ối tơvâ tơvân, biên chế oh tá tŭm, malối kăn ƀô̆ ki  pêi tơdroăng cheăng ‘na  kŏng ngê̆ thô̆ng tin.

Tơmeăm khoăng a hên cheăm, bêng hiăng tơ’nhiê, rơxế vâ to lăm pêi cheăng oh tá ai. Hlo ai khât tiah tơdroăng ki nếo tối kơpêng mê, pôa Hồ Quốc Dũng, Kăn hnê ngăn tỉnh ủy Gia Lai pơkâ thế mâu kong pơlê pơtối ‘mâi  hơ’lêh tâi tâng mâu ngế pêi cheăng, pơkâ luât pêi cheăng ƀă pơkuâ tơdroăng cheăng pêi nhên khât. 

Mâu tíu pêi cheăng, kơvâ cheăng thế tơrŭm po lâm hnê hriâm tơ’nôm tơdroăng pêi cheăng “ kŏng pêi mơhno rơkong tơpui hnê” ăm mâu kăn ƀô̆ cheăm; tăng ngăn ƀă pâ pơkâ troăng hơla tăng xo lơ pơ’lêh ăm mâu kăn ƀô̆ lăm pêi cheăng,  mâu kăn ki rơlối ing mâu tíu pêi cheăng ki ê troh a tíu oh tá tŭm mơngế. Kong pơlê ‘măn dâng 250 rơtal liăn vâ kơjo kum ăm mâu cheăm bêng rôe tơmeăm, ‘mâi rơnêu, mơdêk, hbrâ tơmeăm.