Tâi tâng kơlo ‘no liăn cheăng dêi 7 to hngêi trung phôh thong  ai tíu kâ koi ối pơtê pơtối râ Má môi ƀă râ Má péa a mâu cheăm tơkăng kong peăng mâ hâi Lu kong pơlê Gia Lai cho lối 1.500 rơtal liăn, châ mơjiâng pro a tơnêi rơdâ vâ chê 52 hec-tar. Kong pơlê pơkâ pơkâ pê klêi ƀă pơcháu tâi tâng 7 to hngêi trung mê hdrối hâi lơ 31/7/2026.

La nôkố, nếo bú ai môi to hngêi trung Ia Puch ai tiô pơkâ  pêi, ối 6 to hngêi trung xuân hrá kêi tâng vâ pơchông ƀă tơdroăng pơkâ apoăng. Ki xiâm xua mâu ki hnê tối vê hdró tơbleăng pro hrá, hlối ôh tá ai tŭm mơngế pêi, tơdrêng ƀă yă tơmeăm vâ mơjiâng pro to kơnâ tung pơla chê kố.

Klêi tăng ngăn ăm hlo, pôa Thái Đại Ngọc, Kăn pơkuâ hnê ngăn Đảng ủi kong pơlê Gia Lai pơkâ thế ngế pơkuâ ‘no liăn ƀă mâu Khu pơkuâ mơjiâng pro tăng mơngế pro, tơkâ luâ xơpá vâ rĕng pêi kêi tro tiô tơdroăng pơkâ. Mâu tíu pêi cheăng, kơvâ cheăng tơrŭm veăng tah xơpá ‘na tơmeăm mơjiâng pro, tơniăn ăm tơdroăng teăm pro vâ xúa tung hơnăm hriâm nếo.

Pakĭng mê tăng ngăn, tơ’nôm mâu tơdroăng pêi vâ tơniăn xúa tơmeăm khoăng, tơmâng pêt loăng ăm ngiât lĕm, kơpong hngêi ối ăm mâu thái cô ƀă hok, ƀă ai mâu tíu ok xok ki krúa lĕm tơtro.