Hâi lơ 3/7, a Hneăng hôp roh má 12, Khu kăn Đảng ƀô̆ kong pơlê Gia Lai hiăng pơkâ mâu tơdroăng cheăng pêi ki kal tung 6 khế mơ’nui hơnăm 2023. Tung mê mâu tơdroăng cheăng, troăng rơhlâ mơdêk cho kơxô̆ liăn ngân ‘no mơjiâng tơmeăm khoăng tơnêi têa. Tiô tối tơbleăng a hneăng hôp, ki mơnhông cheăng kâ dêi Gia Lai 6 khế hdrối châ 5,54% tâng pơchông ƀă hơnăm nah.

Mâu pơkâ ‘na kơxô̆ liăn châ xo, pêi cheăng ƀă kơmăi kơmok tâk hên; kơxô̆ khu mơdró chêh inâi vâ pêi cheăng nếo ƀă kơxô̆ tơdroăng tơkêa bro ‘no liăn cheăng tâk; tơdroăng ôm hyô hlo tơƀrê. Laga, hên kong pơlê a Gia Lai xuân trâm pá tung tơdroăng xo liăn xúa tơnêi chiâng ôh tá ai liăn vâ ăm pêi mâu tơdroăng tơkêa bro ‘no liăn cheăng; hrá pơkâ xúa tơnêi; tơdroăng tối tơbleăng pêi mâu pơkâ dêi tơnêi têa hrá.

Krê tơdroăng ‘no liăn mơjiâng tơmeăm khoăng tơnêi têa, tâi khế 6, kong pơlê ăm xo liăn ngân hâi châ 14%. Kố xuân cho kơvâ cheăng ki Vi ƀan hnê ngăn kong pơlê Gia Lai ƀă mâu kơvâ cheăng dêi kong pơlê tơkŭm mơnhên klêi tung la ngiâ. Vi ƀan hnê ngăn kong pơlê Gia Lai xuân hiăng mơjiâng 3 tôh pêi cheăng vâ mơdêk séa ngăn, mơhnhôk, tơleăng mơnhên klêi mâu tơdroăng nếo trâm.