Kơxê lơ 22/6, Khu pơkuâ ngăn Đảng Gia Lai tơkŭm po Rôh hôp mơgêi 10 hơnăm pêi pro Pơkâ 29-NQ/TW dêi Khu pơkuâ ngăn Tíu xiâm Đảng ‘na hơ’lêh nếo tung hnê hriâm ƀă hnê cheăng pêi. Nôkố, a kong pơlê Gia Lai ai 1.049 tíu hnê hriâm.

Pêi pro tiô Pơkâ 29, kong pơlê hiăng kơdroh 83 tíu hnê hriâm tâng pơchông ƀă 10 hơnăm nah, 80% kăn ƀô̆ pơkuâ, thái cô hiăng châ pêi pro tiô pơkâ tơdjuôm ƀă luâ tâ kơ mê nếo. Rơtế amê, túa ki hnê ƀă hriâm; túa ki tơ’noăng, séa ngăn  ƀă mơnhên tối klêi kơ’nâi hnê châ hơ’lêh nếo; tơdroăng cheăng hriăn ngăn khoa hok, mơhnhôk hok tro, sinh viên ƀă túa tơmiât pơxiâm vâ pêi cheăng châ tơtrŏng tâ.

99,6% kơxô̆ ngế hok tro hdroâng kuăn ngo hriâm klêi râ má môi; ‘mot nâl Jarai bă Bơhnéa tung hnê. Laga, ƀă tơdroăng cho kong pơlê peăng kong ngo, 46% pơ’leăng mâ mơngế cho hdroâng kuăn ngo; tíu kuăn pơlê rêh ối preăng iâ a mâu kơpong hngế hngo ƀă hên ki ê pro tơdroăng pêi pro pơkâ 29 trâm hên xơpá.

Tơdroăng hnê hriâm phôh thong châ pơxiâm xúa sap ing hơnăm hriâm 2020 – 2021 tá hâi châ rak tơniăn tiô tơdroăng pơkâ mơ’no; kong pơlê dế ối kal 4.500 ngế thái cô, mâu ngế cheăng. Tơdroăng ki ‘mot tơrŭm tung môi to hngêi trung lâm hriâm xơpá; hnoăng cheăng hnê cheăng tá hâi pêi pro châ tiô tơdroăng ki rơhêng vâ.