Peăng xêi hâi lơ 4/11, Khu pơkuâ hnê ngăn Đảng kong pơlê Gia Lai hiăng tơkŭm Po hneăng hôp Mơgêi 5 hơnăm rak vế, pêi pro tơdroăng pơkâ kơxô̆ 38 dêi Khu pơkuâ hnê ngăn Đảng, rak vế tiô pơkâ kơxô̆ 13-CT/TW dêi Khu xiâm pơkuâ hnê ngăn Đảng ‘na thăm mơdêk hnoăng pơkuâ ngăn dêi Đảng ƀă tơdroăng pơkuâ ngăn, rak vế kong kế, ngo ngối, loăng pơlái dêi kong pơlê kố.

Tiô tơdroăng ki ăm ‘nâi ing roh hôp mê, troh nôkố, Gia Lai hiăng pêi pro klêi hnoăng cheăng seá mơnhên ngăn, ‘mâi rơnêu tơdroăng pơkâ dêi 3 túa kong troh a hơnăm 2025, hnoăng cheăng vâ pêi pro troh a hơnăm 2030 ah nếo, tăng troăng mơjiâng pro tơ’lêi hlâu tung pơkuâ ngăn, rak vế kong. Khu kăn kong pơlê xuân hiăng mơhnhôk rêm khu râ veăng tơlo châ 1 rơpâu rơtal liăn ing kơxô̆ liăn kum pêt mơjiâng, rak ngăn kong. Mâu khu mơdró kâ, rêm rơpŏng hngêi, mơngế krê hiăng veăng pêt châ lôi 24 rơpâu ha kong ki nếo pêt mơjiâng.

Maluâ ti mê, tung hnoăng cheăng pơkuâ, rak vế ngăn kong a Gia Lai xuân ối trâm hên mâu tơdroăng ki pá puât xua liăn ngân tá hâi teăm tơxâng ƀă tơdroăng ki pói rơhêng vâ; hên ƀăng kong hiăng tro khu ngế ‘mêi ko ‘nhê, hdi xo tơnêi pêi pro mâu tơdroăng krê tơná, tơdroăng ki tơbriât tơnêi kong xuân u ối, hên ƀăng kong hiăng tro ko kếo ‘nhê hên ó. Kong pơlê Gia Lai kơdo mơ-eăm troh a hơnăm 2025 ah kô pêt châ 47,75% kong. Rêm hơnăm kô pêt nếo 8 rơpâu ha kong ƀă hnối mơjiâng mâu tơmeăm pá kơdâm xiâm loăng tung kong.