VOV4.Xơ Đăng - Kơxê lơ 1/8, Khu pơkuâ ngăn Mố đô̆i gâk tơkăng kong Gia Lai tơkŭm po rôh hôp Mơgêi tơdroăng ki pro xôi roê tê 7 ngế rơtăm Jarai ngi kong têa Kul. Khu ki ngăn ‘na tơdroăng xôi hiăng pêi pro nhên tơdroăng ki pro xôi ‘na tơdroăng ki tê roê mơngế dêi Trần Quang Quyết, ối a tơring Ia H’Drai, kong pơlê Kon Tum prếi Phan Ngọc Đức, ối a tơring Quỳ Châu, kong pơlê Nghệ. 3 ngế ki ai tơdjâk troh tơdroăng pro xôi kố cho Cầm Bá Sáu, Nguyễn Đức Tâm, pơrá ối a tơring Ia Grai ƀă Lục Quang Trường, ối a tơring Ia H’Drai, kong pơlê Kon Tum.

5 ngế ki tro tê ngi kong têa ê châ tŏng xo a hâi lơ 4/7

Khu tơleăng tơdroăng xôi hiăng hnê mơhnhôk rơpŏng Trần Quang Quyết ƀă âu ngế ki ai tơdjâk nâp 28 rơtuh liăn tung tơdroăng pro xôi. Nôkố, khu mố đô̆i gâk tơkăng kong Gia Lai dế mơdêk hnê tối tung kơpong hdroâng kuăn ngo mơnhông tơdroăng ki hbrâ kơchăng ƀă mâu tơdroăng ki lơ tro hêak pơloi, djâ mơngế ngi kong têa Kul ôh tá troh luât.

Katarina Nga tơplôu ƀă tơbleăng