VOV4.Xơ Đăng - Hâi lơ 8/9, Kŏng an kong pơlê Gia Lai tơkŭm po leh tơbleăng mơjiâng ƀă pơxiâm mơhno mâ Ƀơrô cheăng tơpui, tơbleăng Hbrâ mơdât ma tŭi ƀă mâu ngế ki pro xôi tơkâ luâ tíu tơkăng kong kong pơlê Gia Lai. Kố cho ƀơrô cheăng ki tơpui tối, tơbleăng má 22 a 15 to kong pơlê ai troăng tơkăng kong dêi tơnêi têa pin. Kong pơlê Gia Lai ai vâ chê 90 km troăng tơkăng kong, tơkoh ƀă kong pơlê Ratanakiri, kong têa Kul, ai Bo cheăng lâp plâi tơnêi Lệ Thanh, 2 troăng po, 6 to troăng ki kŭn.

Kŏng an kong pơlê Gia Lai xo tơdroăng pơkâ mơjiâng Ƀơrô cheăng tơpui tối ‘na Hbrâ mơdât ma tŭi ƀă mâu ngế ki pro xôi tơkâ luâ tíu tơkăng kong

Kơpong tíu tơkăng kong cho tíu ki pơto chơ xiâm dêi mâu ma tŭi, tíu ki kơtoâ pơkí, kuăn kiâ kong; tê mơdró ƀă ăm mâu ngế ki tơkâ luâ tíu tơkăng kong ôh tá tro luât. Xua mê, tơdroăng ki mơjiâng ƀơrô tối tơbleăng vâ hbrâ mơdât mâu tơdroăng cheăng dêi mâu ngế ki pro xôi kố cho kal khât. Tung la ngiâ, Ƀơrô cheăng tối tơbleăng hbrâ mơdât ma tŭi ƀă mâu ngế ki pro xôi tơkâ luâ tíu tơkăng kong Gia Lai kô tơpui tơno, môi tuăn, mơjiâng vâ pơkâ hlá mơ-éa chôu vế ‘na hnoăng cheăng tơrŭm ƀă Ƀơrô cheăng a kong pơlê Ratanakiri, kong têa Kul: tơdrêng amê hlối rế hía rế mơjiang ƀơrô troăng ‘na hbrâ mơdât ma tŭi ƀă mâu ngế ki pro xôi a troăng tơkăng kong a kong pơlê kố.

Katarina Nga tơplôu ƀă tơbleăng