Kơxo lơ 4/11, Khu pơkuâ hnê ngăn Đảng uỷ kong pơlê Gia Lai tơkŭm po Hneăng hôp mơgêi 5 hơnăm pêi pro Tơdroăng mơnhông mơdêk kơvâ ôm hyô a kong pơlê. Hneăng hôp hiăng pơkâ pêi troh hơnăm 2025, Gia Lai tơdah 2,1 rơtuh roh tơmối, tâi tâng pêi lo liăn ing ôm hyô châ 1.400 rơtal liăn.

5 hơnăm hiăng hluâ, kơlo tơtêk mơnhông ôm hyô a Gia Lai ai tơdroăng ki pơ’lêh nhên, pêi lo liăn ƀă kơxô̆ tơmối ôm hyô tơniăn hluâ rêm hơnăm. Hneăng hơnăm 2017 – 2021, tâi tâng kơxô̆ liăn mơ’no mơjiâng pro hngêi trăng, troăng klông tơmeăm ôm hyô lối 245 rơtal liăn, tơkŭm a mâu tíu ôm hyô ki xiâm ai ivá chiâng pêi pro rĕng.

Hneăng hơnăm 2022 – 2025, Gia Lai mơnhên la ngiâ mơnhông ôm hyô krá tơniăn ing mơjiâng mâu tơmeăm ki xiâm, ki tơ’lêi hlâu vâ mơjiâng pro tíu ki rơdêi ăm ôm hyô Gia Lai môi tiah: Tơdroăng tơkêa bro Ôm hyô Biển Hồ - Chư Đăng Ya, kơpong ôm hyô ngăn loăng pơlái kong xí Phú Cường, kơpong ôm hyô ngăn loăng pơlái kong kế kơdrum tơnêi têa Kon Ka Kinh kơpong rak vế kong kế kuăn kiâ kong Kon Chư Răng, long têa Ayun Hạ, long têa hngêi kơmăi on tơhrik Sê San 4 – xí Mơ. Mơjiâng mâu troăng pêi ôm hyô pơlê pơla, ôm hyô thôn pơlê.