VOV4.Xơ Đăng - Hdrối vâ mot hơnăm hriâm nếo 2022 – 2023, kơvâ ngăn hnê hriâm ƀă hnê mơjiâng tuăn ngoâ rơkê Gia Lai dế tơbleăng tơdâng tơmô hên troăng hơlâ vâ rak vế tŭm kơxô̆ thái cô, malối cho thái cô ki hnê mâu môn tung tơdroăng hriâm phôh thong nếo ƀă mâu khô̆i lâm 3, lâm 7 ƀă lâm 10. Tiô klêi kơ’nâi séa ngăn dêi Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai, hơnăm hriâm 2022 – 2023 kố, kong pơlê ối kal 3.414 ngế thái cô riân tiô pơkâ kơlo hok tro.

Gia Lai: Ối kal thái cô hdrối vâ mot tung hơnăm hriâm nếo

Vâ rak tơniăn ăm hơnăm hriâm nếo, mâu tơring, pơlê kong krâm, pơlê kong kơdrâm a Gia Lai dế tơbleăng hợp đồng, rah xo nếo thái cô hnê nâl Ănglê; Khu ngăn hnê hriâm ƀă hnê mơjiâng tuăn ngoâ rơkê tơkŭm po hnê tơ’nôm môn tin học ƀă kŏng ngê̆ râ má môi ƀă mâu thái cô ki ai ivá vâ pêi pro châ tiô tơdroăng ki rơhêng vâ hnoăng cheăng hnê ki hdrối tâ.

Pakĭng mê, tiô hnê mơhno dêi Vi ƀan hnê ngăn kong pơlê Gia Lai, mâu tơring, cheăm dế tơrŭm ƀă kơvâ ngăn hnê hriâm ƀă hnê mơhno pơtối mơdêk rĕng tơdroăng ki tơkŭm lâm, ‘mot tơkŭm hngêi trung, kơdroh pro ‘nâng ‘nâi kơ koan pêi cheăng.

Katarina Nga tơplôu ƀă tơbleăng